Граѓаните кои го блокираат пристапот за возилата за собирање и транспорт на отпадот и покрај снегот и дождот, денеска околу 14:30 часот не дозволија неколку камиони од соседните општини да поминат кон депонијата кај селото Бели.
Возилата за одржување на комуналната хигиена беа запрени пред крстосницата каде што две недели без прекин се одвива блокадата. Од возачите на камионите беше побарано да ги свртат и да се вратат назад.
-Ова е чиста провокација, доаѓаат возила од другите општини со намера да направат инцидент и ние да се тргнеме. Им порачуваме да не си играат со нервите на луѓето овде. Како што дојдоа, така си отидоа. Подобро е да го решиме проблемот на мирен начин, а не вака затоа што протестот е веќе радикализиран и најдобро е да размислат што прават, немаат ништо написмено, ни дозвола, прават на нешто на своја рака, истакна Лазар Захариев, учесник на протестот.
-Се случи токму тоа што го претпоставувавме, дека од комуналните претпријатија ќе играат на картата да нѐ фатат на кондиција, но имаме солидна група луѓе тука и ги детектиравме камионите уште на влезот во Кочани кај хотелот „Национал“ и успеавме овде да ги блокираме. Се работи најверојатно за возила од општините Чешиново-Облешево и Зрновци, и едно од Виница. Дојдоа со автомобил во кој беа нивните раководители, но сѐ е добро кога добро ќе заврши. Провокациите им беа неуспешни и возилата веќе се враќаат. Кога се работи нешто од љубов и со посветеност за да се исправи голема нечовечка, нехумана неправда нема да нѐ спречи ниту снегот ниту дождот, истакна Благица Сабовљевиќ Стоименова, учесничка на протестот.
Присутните на блокадата нагласија дека нема да се откажат од своето барање отпадот од другите општини да не се носи на депонијата кај Кочани. Исто така, од надлежните во комуналните претпријатија побараа да не ги упатуваат возачите на комуналните возила на оваа локација за да се избегнат можни инциденти.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
