Кочани е на 11 место меѓу општините во државата според транспарентноста на буџетскиот процес, а по мерењата на Индексот за отворени општини за 2022 година. Со индекс поголем од 43,3 таа е во втората група од 13 општини кои имаат доволна отвореност на буџетскиот процес.
Податоците и анализата ги објави Здружението за истражувања и анализи – ЗМАИ од Скопје, при што биле испитувани три димензии: транспарентност, вклученост и праведност и отчетност, а резултатите покажале дека најголемиот број на општини имаат минимална отвореност на буџетскиот процес.
Прва е групата од осум општини што ги предводи Битола, а потоа се Валандово, Крива Паланка, Делчево, Центар, Струмица, Богданци и Берово кои се со задоволително ниво на отвореност. Останатите општини во државата имаат недоволно ниво, односно минимална отвореност на буџетските процеси кон граѓаните.
Од соседните општини во микрорегионот според Индексот за отворени општини следуваат Чешиново-Облешево, Зрновци и Виница, а тие се во третата група со недоволно ниво на отвореност.
Преку оценката за транспарентноста е мерен степенот до кој буџетскиот процес, од подготовка, преку донесување, до спроведување, е познат на јавноста, додека со параметарот за отчетност е вреднувано објавувањето на резултатите од работата на локалните власти и на целиот буџетски процес до граѓаните. Во анализирањето на вклученоста се опишани начините преку кои граѓаните, и посебно маргинализираните групи, се вклучуваат во буџетскиот процес, односно дали им е дозволено на овие групи да го искажат своето мислење за локалниот буџет и дали нивниот глас е слушнат. Правичноста истражува каква е застапеноста на маргинализираните групи во различните фази од буџетскиот процес.
Меѓу главните забелешките за слабиот индекс на отвореност на Здружението за истражувања и анализи е наведено дека најслабиот аспект се однесува на недостапноста на завршната сметка во отворен формат, односно само две општини ја објавиле јавно, а 93 отсто од општините не организирале јавна трибина на која се презентирала завршната сметка за 2022 година.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
