Општина Кочани е на четврто место според мерењето на Индексот на отвореност во 2025 година што за 80 општини го направи Фондацијата за интернет и општество „Метаморфозис“ во партнерство со Рурална коалиција, а со поддршка од Владата на Швајцарија преку програмата Цивика мобилитас.
Со индекс од 66 отсто нашата општина е во групата на десет најотворени единици на локална самоуправа, веднаш зад Крива Паланка со 71, Берово со 69 и Демир Хисар со 68 проценти. Потоа следуваат општините Битола, Делчево и Карпош со 66, Валандово со 63 и Богданци, Велес и Кичево со 58 отсто.
Индексот на отвореност ги оценува перформансите на локалната самоуправа во областа на доброто владеење со тоа што се фокусира на четири начела: транспарентност, свесност, пристапност и интегритет и еден заеднички домен присутен во сите четири начела – отворени податоци.
-Најпосветени на транспарентноста годинава се покажаа Кочани и Крива Паланка со 81 отсто, а најниско беше оценета Демир Капија со 13 отсто, која за време на мониторирањето немаше функционална веб-страница. Како добар пример годинава може да ги истакнеме Општина Кочани и Општина Крива Паланка кои усвоија „Внатрешна процедура за отвореност на единиците на локалната самоуправа“ чија цел е да постави јасни насоки за унапредување на проактивната отвореност на локалната самоуправа. Внатрешната процедура беше изготвена преку проектот „Дигитална трансформација на локално ниво – Вклучена заедница за отпорност на корупција“ како одговор на потребите на ЕЛС за воспоставување системски пристап кон транспарентноста, отчетноста и вклучувањето на граѓаните во процесите на донесување одлуки на локално ниво. Насоките од процедурата вклучуваат едноставни чекори за следење и објавување на информации кои произлегуваат од работата на локалните власти, градоначалниците и градоначалничките, општинските совети и јавните претпријатија, со цел зголемување на транспарентноста на институцијата и довербата на граѓаните, се наведува меѓу другото во „Процената на доброто владеење воединиците на локалната самоуправа во Република Северна Македонија преку индексот на отвореност“ што ја објави Фондацијата Метаморфозис.
Во споредба со истражувањето од 2024 година, наодите покажуваат благо подобрување во пристапноста на општините, односно во обезбедувањето јавен пристап до информации од јавен карактер и ефикасни механизми за граѓанска вклученост, со цел овозможување на граѓаните полесно и суштински да се вклучат во донесувањето одлуки на локално ниво и обликувањето подобар живот во заедницата. Според овој критериум Општина Кочани е на петто место во државата.
Заедно со начелата на транспарентност и пристапност, оваа година единиците на локална самоуправа бележат напредок во областа интегритет со вкупно 38 отсто, односно зголемување за 3 проценти во споредба со 2024 година. Во оценувањето на овој критериум, со 86 проценти Општина Кочани е меѓу првите три од сите 80 општини во државата.
Во однос на планските региони, општините во Источниот регион со 47,7 отсто се најотворени, додека најзатворени оваа година се општините од Полошкиот регион со измерен индекс од 32,3 отсто.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
