Општина Кочани и градот Кастроп-Рауксел од германската покраина Северна Рајна Вестфалија денеска потпишаа писмо на намери со што почнуваат поширока и долгорочна соработка во проекти и активности во областа на заштитата на животната средина и искористување на природните потенцијали.
Се работи за втора, возвратна работна средба што се одржа во локалната самоуправа на Кочани, на која градоначалникот Љупчо Папазов со своите соработници се сретна со претставник од германскиот град, а преку видео конференциска врска оствари разговор со градоначалникот на Кастроп-Рауксел, при што беа нагласени резултатите што се очекуваат од воспоставувањето на соработката.
-Влегуваме во процес на дефинирање проекти од областа на водоснабдувањето и одведувањето на отпадните води, а соработката ќе навлезе и во проекти за унапредување на животната средина, управување со отпадот, одржливиот развој на туризмот, а специфично за Кочани е искористувањето на геотермалните потенцијали. До септември ќе аплицираме за искористување средства од 500 илјади евра за изработка на техничка документација, со која стратешки и долгорочно ќе се дефинира развојот на општина Кочани. Тука пред сè мислам на потенцијалите на геотермалните ресурси што ги ставивме на посебно место, а таа техничка документација ќе ни овозможи пристап и до средства од Германската техничка поддршка (ГТЗ) за изработка на проекти што можат да бидат финансирани во висина до 10 милиони евра, истакна градоначалникот Папазов.
Во рамки на воспоставената соработка ќе се формира тим со стручни лица од двата града, кој ќе работи оперативно за изготвување на потребната документација и ќе дава идеи за да се аплицира до пристапните фондови на ЕУ.
-Претставниците од регионалната канцеларија на Северна Рајна Вестфалија ни овозможуваат да го прошириме нашето поврзување, што е многу важно, така што оваа година ќе ја искористиме за да ја продлабочиме соработката врз основа на различни развојни програми и проекти. Во изминатите два дена посетивме различни постројки во делот на водоснавбдувањето и одведувањето на отпадните води, а ги видовме и потенцијалите на градот. Она што може да биде многу битно за Кочани е развојот на туризмот, со што ќе се овозможи и развој на економијата и модернизација на инфраструктурата, истакна Штефан Тројке, претставник од општината Кастроп-Рауксел.
Воспоставувањерто на соработката е во рамки на проектот „Општинска размена на експерти Северна Рајна-Вестфалија и Северна Македонија“, имплементиран од Агенцијата за услуги заедници во еден свет (SKEW) во име на Државниот канцелар на Северна Рајна-Вестфалија и германското Министерство за економска соработка и развој. Целта е зајакнување на партнерството меѓу Република Северна Македонија и покраината Северна Рајна-Вестфалија на локално ниво, за размена на експертиза помеѓу ЕУВ, градот Кастроп-Рауксел, КЈП „Водовод“ и Општина Кочани.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
