Општина Кочани иницира постапка за oсновање нова јавна општинска установа Младински културен центар, за што веќе е изготвена предлог одлука која е доставена до Советот на Општината.
Како седиште на Младинскиот културен центар е определен објектот на постојниот Мултикултурен центар, на улицата „Маршал Тито“ бр. 26, а се планира новата установа да врши дејност од јавен интерес со непрофитна цел.
Во предложените општи одредби за основање на институцијата, меѓу другото е наведено дека тоа се прави заради остварување на локалниот интерес во културата за граѓаните на општина Кочани од областа на издавачката, музичката, сценско-уметничката, филмската и галериската дејност, како и во дејноста на домовите на културата, дејноста за посредување во културата и во дејноста за управување со објекти.
Се предвидува Младинскиот културен центар да работи на создавање информативни и научно-технички содржини, потоа на создавање на програми и проекти од определените дејности, како и нивно пласирање, продажба и афирмација. Реализацијата треба да биде преку разновидни форми за работа со кои ќе се создава, презентира, афирмира и разменува творештвото на младите, со посебен акцент на културно-уметничкиот аматеризам. Покрај театарската, музичката и галериско-ликовната дејност, овде се опфатени и размена на програми, проекти и искуства со сродни институции, асоцијации, невладини организации и поединци од земјата и странство.
Според предлог одлуката, јавната установа ќе се регистрира и ќе работи под фирмата Младински културен центар, со скратен назив МКЦ – Кочани. За вршење на определените дејности таа ќе наплаќа надоместок од корисниците на услугите. Покрај овие приходи, предвидено е да се финансира и од Буџетот на Општина Кочани, од донации, од кредитни средства и од други извори во согласност со закон.
Младинскиот културен центар треба да има Управен одбор од пет члена, а со институцијата ќе раководи директор со кого ќе се склучи менаџерски договор во кој ќе биде утврдена и неговата плата.
Предлог одлуката содржи и други одредби за донесување статут и начинот на функционирање на новата јавна установа, а материјалот ќе се најде на разгледување пред членовите на Советот на Општина Кочани на 37. редовна седница закажана за во вторник, 14 ноември.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
