По повод 10-годишнината од формирањето, Клубот за реален аикидо и кардиофитнес „Нико“ од Кочани денеска беше домаќина на семинар и Државен натпревар во аики демо. Повеќе од стотина учесници од државата и странство беа дел од настанот, нас кој се спроведе и полагање за појаси на натреварувачите.
Претседателот на Аикидо федерацијата на Македонија, Ѓуро Илиќ истакна дека КРА „Нико“ за една деценија прераснал во одличен клуб.
-Денес сме во Кочани, по повод 10 години постоење на Клубот за реално аикидо и кардиофитнес „Нико“. За тие 10 години кочанскиот клуб стана огромен клуб, и сметам дека ова е задоволство на нашата федерација. Покрај семинарот, кој траеше околу еден час, ќе одржиме и полагање за појаси, а имавме и натпревари во дисциплината аики демо, истакна Илиќ.
За почетоците и за тоа како работи клубот денес се осврна Николчо Гоцев, претседател на Клубот за реално аикидо и кардиофитнес „Нико“.
-Во 2013 година стартувавме со првите тренинзи со голема поддршка на Аикидо федерација на Македонија и на Агенција за млади и спорт. Ги посетуваме сите натпреварувања во Европа, сите семинари и секаде сме препознатливи како еден од најуспешните клубови. До денес во нашиот клуб се имаат зачленето над 800 членови, како деца, така и возрасни. Во моментот броиме 130 активни членови. Денеска имаме гости од цел Балкан – Србија, Бугарија, Грција, а секако и од сите клубови од Македонија. Почетниот дел на семинарот го водеа Владислав Павловиќ од Србија, Ѓуро Илиќ, Влатко и Дејан од македонските клубови, истакна Гоцев.
На Државниот натпревар беа доделени седум златни, пет сребрени и осум бронзени медали, а за сите учесници беа обезбедени благодарници и дипломи за учество.
Од неодамна КРА „Нико“ отвори уште една секција во ОУ „Малина Попиванова“, а на почетокот на идната година треба да почне со работа и секцијата во Виница.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
