Членовите на Граѓанскиот одбор против загадувањето од комуналната депонија во Кочани ќе поднесат кривични пријави против директорката на КЈП „Водовод“, градоначалникот и овластените комунални инспектори во Општината, откако втор ден камиони на комуналните претпријатија од Виница, Зрновци и Чешиново-Облешево исфрлаат отпад на депонијата.
Од Одборот наведуваат дека нивната постапка е предизвикана поради грубото кршење на волјата на граѓаните, сублимирана во едногласната одлука на Советот на Општина Кочани дека на градската депонија во Кочани не смее да се исфрла ѓубрето од другите општини.
-Градоначалникот и директорката ги имаат пречекорено службените овластувања и ја злоупотребија функцијата со тоа што дозволија дејства спротивни на одлуката на Советот на Општина Кочани. Исто така, комуналните инспектори несовесно ја извршуваат својата работа. Бараме одговор дали и кога градоначалникот потпишал меморандум за преземање отпад од соседните општини, по чие барање и врз основа на кој закон соседните општини доаѓаат со полициска придружба до депонијата што е во владение на општина Кочани, а дадена на управување на КЈП „Водовод“ и дали директорката е должна да постапува по неосновани усни наредби, се истакнува во писменото известување од Граѓанскиот одбор.
Поради непочитувањето на одлуката на Советот на Кочани, а со тоа и на граѓаните на Кочани, од Граѓанскиот одобор најавија нов протест што ќе се одржи в понеделник, 23 декември. Незадоволството ќе биде искажано со двочасовна блокада во периодот од 13 до 15 часот на кружниот тек кај ОУ „Св. Кирил и Методиј“.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
