Докторката Кристина Серафимова е нова в.д. директорка на Општата болница со проширена дејност во Кочани.
Таа е долгогодишна раководителка на одделението за неврологија во Болницата, а доаѓа на местото на претходната директорка Душанка Горгиева Трпевски, која оваа функција ја извршуваше 12 месеци.
-Од денес официјално сум назначена за в.д. директор на Општата болница со проширена дејност – Кочани. Вработена сум од 2011 година и досега ја извршував функцијата раководител на одделот Неврологија. Имав прекрасна соработка со досегашната директорка, како и со сите доктори, раководители и целиот медицински персонал на Болницата. Цел и приоритет е на пациентите да им овозможиме подобра здравствена грижа за да се унапреди нивното здравје, а и да обезбедиме подобри услови за истите, истакна Серафимова.
На примопредавњето на функцијата, новата в.д. директорка беше запознаена во каква ситуацијата е кочанската болница, како и за тоа кои проекти биле реализирани во текот на претходната година.
-Чест и задоволство, но и голем предизвик беше да се биде директор на Општата болница – Кочани. Оваа функција ја извршував точно 12 месеци. Денеска официјално имавме примопредавање со новата в.д. директорка, Кристина Серафимова. На истата ѝ посакувам многу среќа и успех во понатамошните планови и проекти. Во текот на моите 12 месеци се реализирани неколку проекти, а едното од тие е набавката на ново амбулантно возило, новиот ехоапарат за радиодијагностика од марката „Миндреј“, инсталирани се нови прозорци, клима уреди, адаптирани се и нови простории. Најбитно за мене и за новата директорка е тоа што финансиската состојба на институцијата е добра и позитивна, односно нема загуби, кажа Трпевски.
Решението за назначување на новата раководителка на јавната здравствена установа го потпиша министерот за здравство, Арбен Таравари.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
