Во изложбениот Салон 2 на ЦК „Бели мугри“ вечерва беше отворена изложбата „Нова димензија во создавање 2“ од ликовниот уметник м-р Александра Димитрова од Кочани.
Пред кочанската публика се претставени дваесетина дела кои претставуваат продолжување на досегашните ликовни истражувања и сликарски циклуси што беа почнати во акварелна техника, а потоа прераснаа во градење на бојата во големи формати.
-Овој циклус содржи апстрактно насликани портрети и пејзажни пределина големи и и средни сликарски платна. Со нив оставам простор да пробудат спротивставени чувства кај посматрачот, затоа што како предизвик на досегашните мои дела ја дополнувам приказната од директниот контакт со природата и планинските предели, кои често се мои хранители на душата. За мене овие дела се низа од визуелни единици тенки линии и широки потези на четката со различна густина, кои сочинуваат заокружена целина, истакна авторката на изложбата Димитрова.
На отворањето на изложбата зборуваше и нејзиниот рецензент, уметникот Синиша Новески, кој истакна дека сликите на Димитрова се оригинални и претставуваат нејзино индивидуално гледање и креирање на мотивите.
-Во нејзините слики се чувствува силна експресивност и виталност преку играта на ликовниот јазик. Комплементарноста на топлите и ладните бои ја надополнува со текстура и цртеж, кои преку својот графицизам даваат витални атрибути. Потсвесно или намерно, Димитрова од разиграните слики богати со бои и текстура извлекува со лесна и конструктивна линија одредени ликови и портрети, кои се идеализирани, но сепак носат одредена емоција, лиричност и грациозност, истакна Новески.
Пред присутните во преполниот Салон 2, се обрати и градоначалникот Љупчо Папазов, кој го истакна задоволството што еден роднокраен ликовен уметник, како што е Димитрова, освен што своите чувства и видувања ги пренесува на сликарското платно, успешно работи со најмладите во општината, во рамки на Школата за цртање и сликање при ЦК „Бели мугри“.
Изложбата „Нова димензија во создавање 2“, како дел од новиот ликовен циклус на Димитрова, освен во Кочани, ќе биде претставен и во други градови во државата, како проект Патувачка самостојна изложба, што е поддржан од Министерството за култура, ЦК „Бели мугри“, Општина Кочани и бизнис секторот.
Отворањето на изложбата беше збогатено со музички точки на пијано што ги изведе Макарија Иванова, ученичка во ОМУ „Ристо Јуруков“, со поддршка од својата наставничка Марија Лазарова.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
