Во библиотеката „Искра“ денеска се одржа првата од серијата работилници со учениците од основните училишта во кочанскиот регион во рамки на проектот „Децата, книгите и добрината“.
Се работи за проект од истражувањето што Oxford University Press го спровел минатата година и на кое учествувале повеќе од 6 илјади деца од целиот свет на возраст од 6 до 14 години. Зборот „добрина“ го избрале 61 отсто од анкетираните деца, во конкуренција со уште три збора.
-Денеска се реализираше првата работилница од проектот со ученици од четврто одделение од ОУ „Никола Карев“ заедно со ментор, нивната наставничка Анкица Манасиевска. Планираме овој проект спонтано да трае цела 2025 година меѓутоа неизбежно е без соработка со нашите верни соработници, основните училишта од општина Кочани, Зрновци и од Чешиново-Облешево. Исто така, предвидено е со овој проект да спроведеме и летна литературна школа, а ќе ги вклучиме и дечињата од предучилишна возраст. Целта е тие да се дружат со литературата не само во училиштата, туку и во библиотеката. Водени од идејата на зборот добрина, ќе се организираат работилиници со обработка не само на лектирни изданија, туку и со слободна детска литература коишто не е влезена во образовниот систем. Ќе се спроведуваат разни работилници со квизови, со прашалници, со различни видови на игри и слично, рече Кристина Ѓорѓиевска Атанасова, директорка на библиотеката „Искра“.
На првата работилница учениците од „Никола Карев“ имаа и вежби со прашалници на тема „добрина“, а се запознаа и со синонимите, односно со зборовите што се користат во секојдневниот говор и кои имаат слично значење.
-Бидејќи книгите, децата и добрината се сојузници, наша задача и радост оваа година ќе биде преку игра, преку разговор за добрината и со обработка на леитературни дела да ги славиме овие реални протагонисти. Се надеваме дека децата веќе се служат со гестови на добрината, а ова ќе остави траен впечаток и навистина ќе ги мотивира да внимаваат на своето однесување и да бидат љубезни, пристојни и учтиви, истакна Ивана Николова, координаторка на проектот.
Работилниците со учениците ќе продолжат секој месец, при што ќе бидат опфатени и другите училишта од Кочани и соседните две општини.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
