Македонската Боречка федерација (БФСМ) денеска во Кочани го почна проектот „Развој на националниот спортски систем“ преку кој во наредниот едногодишен период ќе се спроведува обука за тренерите од домашните клубови.
Проектот е поддржан од Меѓународната боречка федерација (UWW) и Македонскиот олимписки комитет (МОК), а планирани се десет сесии со теоретска и практична настава.
Во обуката се вклучени претставници и тренери од 21 клуб од државата, кои ќе следат предавања од почетно до највисоко ниво, за работа со најмлади спортисти, но и со повозрасните, сениорски категории во кои веќе има врвни борачи.
– Тема на денешната прва сесија е промоција на борењето меѓу најмладите, односно како преку игра и забава тие да се запознаат и да почнат со тренинзи, а потоа да се задржат во клубовите и понатаму да се надградуваат и да напредуваат во успешни спортисти. Во наредните сесии предавањата ќе бидат за напредните категории на борачи. Посебно внимание ставаме на женското борење во кое за само три години имаме огромен развој и успеси. Потврда за тоа е што се освоени голем број медали од балканските првенства, а Вероника Рјабоволова минатата недела освои златен медал на турнирот „Јашар Доглу“ во Турција, што е натпреварување од ранг на европско првенство. Со тоа очекувам дека за првпат ќе имаме олимписка норма во женското борење, истакна Дејан Богданов, претседател на БФСМ.
Обуката за тренерите ја спроведува бугарскиот боречки стручњак Ѓорѓи Сретков, кој е лиценциран предавач од UWW, нагласи дека македонското борење во последните години бележи голем напредок.
-Од моето досегашно искуство можам да кажам дека во споредба со боречките федерации од балканските и другите земји, македонската федерација во моментот се развива екстремно брзо, со динамично темпо, поради што веќе има докажани резултати на натпреварувањата. Добро е што тоа не ги задоволува вашите тренери и спортисти, туку продолжуваат да се развиваат и надградуваат и понатаму. Според мене, тие во моментот се број еден според темпото на развој во рамки на Меѓународната боречка федерација, истакна Сретков.
Боречкиот клуб „Спартак“ од Кочани е домаќин на обуките за тренерите, а покрај теоретската настава, ќе се спроведуваат и тренинзи во сала со младите спортисти, членови на клубот.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
