Родителите на загинатите во трагедијата во клубот „Пулс“ и Здружението „16 март 2025 – Кочани“ денеска го организираа 27. „Марш за ангелите, со што ги продолжуваат барањата за правда за своите најмили.
На почетокот на колоната родителите носеа дел од стотиците писма за поддршка што ги добиле од голем број граѓани од земјата и странство, а во кои се искажува сочувство, емпатија и револт од настанот во кој поради неодговорност на надлежните институции и нефункционирањето на системот загинаа и со сериозни телесни и психички повреди се здобија голем број млади.
Маршот почна од Паркот на Револуцијата и продолжи кон Трговскиот центар, каде родителите реагираа што поранешниот градоначалник на Кочани, Ратко Димитровски, кој е меѓу обвинетите во судскиот процес, седи во ресторан со еден од актуелните кандидати за градоначалник.
Потоа колоната продолжи кон Управата за јавни приходи, а оттаму се упати пред Полициската станица, каде родителите остварија средба со началникот Одделението за внатрешни работи. Од него побараа одговор за мерките што се преземени против поранешниот градоначалник и дали службите ги спроведуваат.
Учесниците на маршот потоа продолжија кон крстосницта на булеварот „Стево Теодосиевски“ кај двојниот мост, каде имаше десетминутна блокада на сообраќајот.
Оттаму се упатија пред Основниот суд и Јавното обвинителство, но немаа јавно обраќање, укажувајќи дека она што се случува со луѓето кои се вмешани во целиот процес доволно зборува за правичноста и за надежите за правда од судската постапка.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
