Министерството за животна средина и просторно планирање не отстапува од претходно донесената одлука според која отпадот од соседните општини Виница, Зрновци и Чешиново-Облешево треба да се носи на депонијата во Кочани.
Портпаролот на Министерството, Наим Вренези во изјава за телевизијата 24 Вести го пренесе ставот дека причина за чадењето од депонијата не биле зголемените количини отпад што се носи и од другите општини, туку лошото менаџирање на просторот на депонијата предизвикувало загадување на воздухот и животната средина. Со тоа вината за актуелната состојба се префрла на локално ниво, односно на комуналното претпријатие и на општинското раководство.
-Пожарите кои се случуваа во минатото не зависат од количината на отпадот, туку од несоодветното управување со локацијата. Обврската на трите општини, Чешиново-Облешево, Зрновци и Виница да го носат отпадот на локацијата останува сѐ до воспоставувањето на регионалната депонија односно трансфер станиците, бидејќи во овие општини исчистени се сите локации за отстранување на отпад и нема да се дозволи отварање на нови загадени жаришта, истакна Вренези.
И покрај ваквиот одговор од ресорното министерство, граѓаните кои протестираат и го блокираат пристапот до депонијата кај Бели за комуналните возила од Виница, Зрновци и Чешиново-Облешево, а ги пропуштаат камионите на КЈП „Водовод“, не се откажуваат од своите барања.
За денеска во 17 часот, на крстосницата кон Бели, најавуваат голем собир, за што повикуваат и други граѓани од општината да се придружат и да покажат единственост во барањата.
-Доста беше стоење настрана. Ако денес не се појавиме, утре ќе се жалиме на истите работи. Време е заеднички да го подигнеме нашиот глас и да покажеме дека Кочани заслужува подобро, дека ние заслужуваме повеќе. Ова е наша можност, нашиот глас е нашиот избор – нека не остане само на зборови, се истакнува меѓу другото во јавниот повик до граѓаните.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
