По повод Петровден – празникот на градот, градоначалникот на Кочани, Љупчо Папазов имаше средба со најдобрите ученици и првенците на генерацијата од основните и средните училишта во општината.
Во знак на благодарност за постигнувањата им честиташе на учениците и нивните ментори за успесите, како и за освоените награди на домашни и меѓународни натпревари. Приота, им врачи признанија, истакнувајќи дека тоа се прави заради нивно мотивирање и стимулирање, да продолжат со одличниот успех во школувањето и во иднина достојно да ја презентираат општината.
-Сакам да искажам подготвеност, дека во име на Општина Кочани, ќе ги препознаваме нивните резултати, ќе ги почитуваме и ќе ги наградуваме. Во исто време, ви посакувам многу успех во натамошното образование. Нека носат убави резултати, повисоки достигнувања, нека носат радости за своите семејства, а да бидат гордост за градот Кочани, истакна градоначалникот Папазов.
Првенците на генерација се Андреа Димитрова од ОУ „Никола Карев“, Ева Костадинова од ОУ „Крсте Петков Мисирков“ – Оризари, Павел Монев од ОУ „Кирил и Методиј“, Анастасија Богданова од ОУ „Раде Кратовче“, Драган Станишков од ОУ „Малина Попиванова“, Никола Илиев од ОМУ „Ристо Јуруков“, Мартин Коцев од СОУ „Гошо Викентиев“ и Мери Манасиева од СОУ „Љупчо Сантов“ и тие за постигнати високи резултати во наставата, вон наставата, успеси на натпревари и за афирмирање на Општина Кочани добија статуетка на Општина Кочани, пофалница и парична награда од 15 илјади денари.
Климент Филипов од ОУ,,Никола Карев“, којшто освои прво место на Државниот натпревар по математика, Владимир Грчев од ОУ,,Св. Кирил и Методиј“, првак на Државниот натпревар по информатика, Јована Давиткова – прво место на Државното првенство во шах и Макарија Иванова – прво место на Државниот натпревар по пијано се ученици наградени со ваучер од 6 илјади денари, а пофалници од Општина Кочани добија и членовите на училишната кошаркарска екипа на ОУ „Св. Кирил и Методиј“ и тимот роботичари од СОУ „Гошо Викентиев“, кој освои првото место на Државниот натпревар по роботика. Специјална награда во износ од 6 илјади денари доби Ивона Тодорова, ученичка од СОУ „Љупчо Сантов“, како најдобар оратор на 11. Ораторска вечер на Правниот факултет при УГД – Штип.
Во рамки на празничната средба ученици од ОМУ „Ристо Јуруков“ изведоа кратки музички точки.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
