Општина Кочани ги почна подготвителните активности за реализација на најавената реконструкција на дел од булеварот „Тодосија Паунов“ за што планира да инвестира над 1,2 милиони евра, без даночните давачки.
За оваа намена во најголем дел ќе бидат искористени добиените 89 милиони денари од кредитните средства од Владата, преку проектот за распределба на 250 милиони евра за капитални инвестиции во општините.
За овие пари, што се распределуваат под мотото „За тебе – државата за општините“, кон крајот на октомври минатата година градоначалникот Љупчо Папазов потпиша договор со Министерството за транспорт, обврзувајќи се да ги потроши како инфраструктурна инвестиција наречена „Модернизација на источен влез на градот“. Притоа беше најавено дека во финансиската конструкција на овој проект Општина Кочани ќе учествува со 3,5 милиони денари сопствени средства.
Во тек е јавниот повик за прибирање понуди од градежните компании кои се заинтересирани да учествуваат во реконструкцијата на коловозот и придружните елементи во должина од околу 1 километар, од спојот на улицата „Киро Кикенски“ до почетокот на разделното зеленило кај СОУ „Гошо Викентиев“.
Според техничката спецификација во јавната набавка, освен отстранувањето на постојниот асфалтен слој и поставувањето нов на двете коловозни ленти од булеварот, на јужната страна ќе се изгради и потпорен ѕид во должина од околу 400 метри. Исто така, ќе се изгради и нова тротоарска површина во правец на Оризари, на која ќе се вградат бехатон елементи, а треба да се реконструираат нивелираат и постојните шахти и сливници.
Рокот за поднесување на понудите по јавниот повик е до 17 јануари, а по изборот на изведувачот и потпишувањето на договорот со Општината, тој ќе има обврска преземените градежни задачи да ги комплетира во рок од 12 месеци. Дополнително, додека трае реконструкцијата, ќе треба да обезбеди времен режим на сообраќајот со соодветна патна сигнализација.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
