Вработените во водостопанската подружница „Брегалница“ изутрината регистрирале ново намерно оштетување на гумената брана кај селото Грдовци, што се користи за зафаќање на водата од реката Брегалница и наводнување на околните оризови ниви.
Непознат сторител со остар предмет ја исекол гумената обвивка во должина од околу половина метар, по што дошло до истекување на акумулираната вода и празнење на помошниот канал од водозафатот. Во тек се активности за санирање на оштетувањето на гумената преграда, но постапката е отежната поради зголемената количина вода.
Одговорните технички лица за одржување на каналската мрежа на подружницата информираа дека во измнатите неколку дена гумената преграда повеќе пати била оштетена.
– За седум дена имаме шест обиди за сечење на гумата. Оштетувањата мораме да ги санираме, затоа што во спротивно во прашање ќе биде наводнувањето на околу 100 хектари оризови површини. Ова ни се случува секоја година, односно за 32 години, колку што е стара гумената преграда, имаме 40 лепенки, што значи дека некој намерно го прави ова, дали за да му наштети на населението од село Грдовци или на пак нас, не можеме да знаеме. Ние веќе пријавивме во полиција со кривична пријава против непознат сторител, а ќе ангажираме и посебна служба за чување. Материјалната штета не е голема, меѓутоа е многу тешка постапката за да се залепи, треба многу луѓе, треба посебна техника. Доколку не го направиме тоа навистина ќе претрпиме голема штета, и ние како фирма, а и самите земјоделци, истакна Станче Стефанов, техничко лице во водостопанската подружница „Брегалница“.
Подготовките за пуштање на водата во овој дел од атарот на Грдовци биле завршени, но и полнење на оризовите ниви е одложено за неколку дена.
-Водата требаше да ја пуштиме на 19 април, тогаш и ја подигнавме гумената преграда, но видовме дека на две места е пресечена и ја залепивме. Меѓутоа, по два дена ја исекле на уште на три места, додаде Стефанов.
Вработените во подружницата очекуваат до крајот на денот да ја нормализираат состојбата со наводнувањето, за да се избегне прекин на сеидбената сезона во овој регион, но и да не дојде до исушување на нивите кои веќе се посеани со ориз.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
