Во Виница се одржа втората сесија од проектниот Форум во заедницата, на која присутните граѓани, поделени во работни групи, се запознаа и одбраа предлог-проекти што ќе одат на понатамошно разгледување.
Сите предложени проекти беа од областа на заштитата на животната средина, што како тема беше избрана на првата, воведна сесија што се одржа пред десетина дена.
-Од предложените шест предлог-концепти, пет беа прифатени од форумот и за истите во наредниот период треба да се изработат предлог-проекти за кои ќе се одлучува на наредната форумска сесија. За третата форумска сесија работните групи треба да изработат целосни предлог-проекти, со буџет и сè друго што е потребно, а потоа ќе се разгледува можноста секој од нив да се изработи. На наредната сесија треба да се види кои проекти се реални за реализација, а на четвртата сесија сите тие ќе бидат ставени на гласање пред форумот, а секоја работна група ќе има свој глас, истакна Тодор Цонев, комодератор на Форумот во заедницата во Виница.
На втората форумска сесија беа предложени проекти за набавка на возило за собирање комунален отпад, за енергетско ефикасни фасади на јавни објекти во општината, промена на уличното осветлување со енергетски ефикасни светилки, промена на кровните конструкциина јавни објекти во општината, набавка на контејнери за селекција на отпадот и за изградба на пешачка патека до месноста Чупино. Од сите овие предлози, само набавката на контејнерите не доби поддршка од присутните на Форумот.
Следната форумска сесија треба да се одржи на 20 декември, а последната, четвра средба е до крајот на јануари идната година.По изборот на проектот што ќе добие финансиска поддршка, обврската за негова практична реализација ќе ја преземе Локалната самоуправа на Виница. За овие активности пак, обезбедена е грант поддршка од УНДП во висина од 50 илјади американски долари, како и учество на Општината со средства од сопствениот буџет.
Виница е една од десетте општина во државата кои се опфатени со втората фаза на проектот „Зајакнување на општинските совети“, што се реализира во рамки на Програмата за развој на Обединетите Нации – УНДП, Швајцарската влада и Министерството за локална самоуправа.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
