Во присуство на градоначалниците, роднини на Карев, владини и претставници од Сојузот на борците, извидници, ученици, планинари и поголем број граѓани, свечено беше предаден во употреба спомен паркот посветен на големиот македонски револуционер.
– Карев, херојот илинденец, се вгради во сегашноста во која живееме. Уште на почетокот на минатиот век покажал високоразвиена свест за соживот меѓу граѓаните без разлика на верата, етничката припадност, полот и социјалниот статус. Нашата почит кон Карев се одразува во настојувањата постојано да укажуваме на значењето на неговото дело пред новите генерации. Спомениците посветени на Карев во Кочани, од овој 27 април ги збогатуваме со уште едно спомен-обележје, овде во Свиланово, рече градоначалникот на Кочани, Николчо Илијев.
Проектот за изградба на спомен паркот за Карев со 5,6 милиони денари е финансиран од Програмата за развој на планските региони за 2017 година на Министерството за локална самоуправа – Биро за регионален развој, а со кофинансирање од општините Кочани и Чешиново-Облешево.
– Сведоци сме дека со реалзиацијата на овој проект се обезбеди достојно обележје на местото на загинувањето на Карев, но и пристојно место за одмор во прекрасниот осоговски планински амбиент. Наша должност е да ја почитуваме и да учиме од историјата, но и наша света обврска е да обезбедиме достоинствен живот за сите граѓани на Република Македонија и да отвораме нови перспективи за нас и нашите поколенија, рече заменик министерот за локална самоуправа, Дејан Павлевски.
Од името на граѓаните на Крушево, благодарност за поканата на свеченоста да присуствува и делегација од оваа збратимена општина упати градоначалникот Томе Христоски.
– На овој ден, во 1905 година, борбата за слобода на Македонија изгуби еден голем човек. Но, со таа смрт не престана да вирее духот на херојството и целите за кои Карев се залагаше. Да го одбележуваме овој ден како уште една причина за борба која ја водиме и ден денес, а тоа беше борба за слобода, живот и соживот, рече Томе Христоски, градоначалник на Општина Крушево.
На свеченоста по повод одбележувањето на годишнината од смртта на Никола Карев, присуствуваа и негови роднини, кои се заблагодарија за можноста да го посетат местото каде загинал нивниот дедо, при што упатија забелешка за исфрлањето на неговото име од државната химна.
– Во химната порано се пееше Гоце Делчев, Питу Гули, Карев, Даме, Сандански. Неколку години од химната е исфрлен Никола Карев, нашиот дедо. Сакаме да знаеме по која основа и дали заслужил, барам да ми одговори некој историчар од нашата држава, рече Трајко Карев, внук на Никола Карев.
Спомен обележјето во Свиланово е на површина од 460 м2, комплексот содржи четири амфитеатрални редови, а во центарот се сместени три мермерни плочи со ликот и името на Карев.
T. Ajтовски
{fshare}
https://www.youtube.com/watch?v=E_RYDywH3YY
{backbutton}
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
