Во Кочани нема да се формира нова јавна општинска установа Младински културен центар откако предлог-одлуката што ја изготви Општина Кочани не доби поддршка од членовите на општинскиот Совет.
На 37. седница на Советот, иницијативата беше дел од точките на дневниот ред, но со 9 гласа „ЗА“ и три „ВОЗДРЖАНИ“ остана без потребното мнозинство за да можат да почнат практични активности за основање.
Во општите одредби за основање на институцијата беше наведено дека тоа се прави заради остварување на локалниот интерес во културата за граѓаните на општина Кочани од областа на издавачката, музичката, сценско-уметничката, филмската и галериската дејност, како и во дејноста на домовите на културата, дејноста за посредување во културата и во дејноста за управување со објекти.
На почетокот од расправата беа искажани сомневања дека зад намерата да се основа установата има и скриени намери за дополнителни вработувања и оптоварување на општинскиот буџет.
-Ова формирање нова општинска установа значи нов Управен, нов Надзорен, директор, ќе се измисли и по некое вработување, значи плус трошоци што ќе бидат одделени од Буџетот, односно од граѓаните на општина Кочани, истакна Ивана Максимова, член на Советот на Општина Кочани.
-Дали може вработените што се во секторот за култура во Општина Кочани да ја извршуваат работата во Мултикултурниот центар. Имаме таму повеќе вработени, нека се прераспределат на овие работни места, истакна Томе Солевски, член на Советот на Општина Кочани, член на Советот на Општина Кочани.
-Сè што имало во законот сè е ставено како потенцијал, како можност, но јас се прашувам во реалност, откако ќе си го основате, ако сте решиле, ќе видиме како ќе го основате, кого ќе задиректорите, кого ќе ухлебите тука, кои конкретни услуги на крајот ќе ги добијат младите во таа јавна општинска установа што ќе ја наречете Младински културен центар. Со целата желба да им се даде поддршка на младите, јас тука не гледам во оваа форма на бирократизација каква било поддршка за младите, само гледам одлив на дополнителни средства, што наместо да стигнат до младите, ќе стигнат до не знам кого, до некого што ќе треба да се ухлеби, истакна Жаклина Филипова Свеќароска, член на Советот на Општина Кочани.
Градоначалникот Љупчо Папазов даде образложение за иницијативата за формирање на јавна установа Младински културурен центар, оправдувајќи ја со потребата да се стави во функција објектот на Мултикултурниот центар.
-За да ги отстраниме сите ваши сомнежи за неконтролирано вработување предлагам органите на управување да ги преземат тие што се сомневаат. Ќе делегираме вработени во Локалната самоуправа кои земаат плата за извршување слични дејности, да се именува работоводен орган кој ќе почне со активности за усогласување на реалната состојба, имаме објект за кој барате да има озвучување, греење, активностите да бидат координирани, просториите да бидат опремени и на младите да им овозможиме тука да работат. Сакаме со оформување на ваква институција да му дадеме на овој објект едно повисоко ниво, истакна градоначалникот Папазов.
И по ваквото образложение од градоначалникот , членовите на Советот не дадоа мнозинска поддршка за иницијативата, со што јавната установа Младински културен центар не доби согласност за основање.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
