Отстранети се техничките недостатоци што беа констатирани по завршувањето на изградбата на новиот клон „Детелинки“ на детската градинка „Павлина Велјанова“ во населбата Драчевик, со што објектот е подготвен да биде предаден во употреба.
Според заменик-министерот за социјална политика, демографија и млади, Ѓоко Велковски, се чека на решение што треба да го издаде надлежната комисија, по што ќе се спроведе постапка за вработување на потребниот кадар.
-Како што имам информација на последната седница на Совет на Општина Кочани е помината одлуката да се испрати барање до Министерството за социјална политика, демографија и млади за издавање на решение за употреба од страна на Комисијата. Еве сме веќе во завршен дел по однос на пуштањето во употреба на еден, мора кажам, прекрасен објект во Кочани. Во делот на вработувањата, веќе се добиени позитивни согласности од страна на Министерството за финансии, вкупно за 21 стручен работник и друг технички персонал од градинката, кои што ќе бидат доволно за отпочнување на згрижување на децата токму во тој објект. Сега треба само да се издаде решението за употреба на детската градинка за потоа да може да започне процесот на вработување на стручниот кадар. Знаете дека имаме отворен проблем со Законот за заштита на децата, меѓутоа и тој проблем ќе се надмине, па мислам дека за една недела од сега Собранието ќе ја направи потребната корекција на неколку членот Законот којшто биле технички условно неисправни напишани од страна од некои од лицата во Министерството, така што и тој проблем ќе биде надминат и ќе започне процес на лиценцирање како што ветивме, истакна заменик-министерот Велковски.
Заменик-министерот нагласи дека Министерството ќе го заврши својот дел за издавање решение за употреба на новиот клон на градинката, а во делот на вработувањата ќе зависи од тоа колку кандидати во моментов имаат активни лиценци за да можат да аплицираат на огласите што ќе ги објави детската градинка.
Новата градинка во населбата Драчевик почна да се гради пред околу 5 години во рамки на Проектот за подобрување на социјалните услуги што го реализираше тогашното Министерството за труд и социјална политика, а со финансиска поддршка од Светска банка. За изградбата на објектот Општината доби грант од околу еден милион евра, а имаше и сопствено учество во подготвителните работи.
Капацитетот на градинката е проектиран за 110 деца, со шест занимални, на две нивоа со вкупна површина од 995 квадратни метри.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
