Земјоделците кои одгледуваат ориз се соочуваат со построги критериуми за добивање финансиска поддршка од државата, а клучната промена што предизвикува загриженост кај малите земјоделски стопанства е зголемувањето на минималниот праг на оризни површини за производната 2025/2026 година.
Со Уредбата за директни плаќања, што Владата ја донесе на 10 февруари, прагот се зголемува на 0,7 хектари, односно 7 декари, наместо досегашниот минимум од 5 декари. Ова значи дека сите оризопроизводители кои обработуваат површини помали од овој праг, во иднина нема да можат да поднесат барање за субвенции. Тоа претставува сериозен предизвик за економската оправданост да продолжат да ги обработуваат нивите, со оглед на високите производни трошоци, отежнатиот пласман и ниските откупни цени.
За оние кои го исполнуваат новиот критериум за минимум површина, висината на директните плаќања за ориз изнесува 1.800 денари по декар. Сепак, државата воведува и дополнителен услов за оризопроизводителите, односно субвенциите не важат за сортата „чистач“ (clear fields), која не е опфатена со оваа подмерка. При поднесување на барањето, оризопроизводителите ќе мора да достават посебна изјава со која потврдуваат дека засеаните сорти не се од забранетата сорта „чистач“.
Покрај основните субвенции, оризопроизводителите имаат право и на помош за набавка на гориво за земјоделска механизација. Висината на ваквата поддршка за оризот изнесува 320 денари по декар, а се пресметува врз основа на пријавените површини од претходната година. Крајниот рок за поднесување на барањата за оваа финансиска поддршка е 15 мај 2026 година.
Сите административни проверки ќе се вршат преку Единствениот регистар на земјоделски стопанства и Системот за идентификација на земјишни парцели (СИЗП).
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
