По подолг период на стадионот „Никола Мантов“ ќе има подновување во поглед на обезбедувањето подобри услови на гледачите. На теренот веќе се пристигнати нови пластични столчиња како донација, а што е дел од планот за подобрување на инфраструктурните услови на објектот. Во наредните денови се очекува нивнот монтирање, на западната трибина.
Од ФК „Осогово“ рекоа дека со тоа се остваруваат најавите од минатата година дека ќе се работи на унапредување на условите за работа, но и за подобрување на условите за посетителите.
– ГФК “Осогово“ обезбеди 1.500 нови столчиња кои ќе се монтираат на стадионот “Никола Мантов“ и истите се донација од Фудбалската федерација на Македонија. Се надеваме дека со помош на Локалната самоуправа и на КЈП “Водовод“ ќе успееме да ги монтираме столчињата, се со цел за подобар комфор на гледачите во наредните неколку години, рече Венко Крстевски од ГФК “Осогово“.
На западната трибина на стадионот “Никола Мантов“ веќе има околу 500 пластични столчиња што беа монтирани пред повеќе години, а со новата донација практично ќе се обезбедат подобри услови за седење на целиот простор на трибината.
Крстевски најави дека во план е продолжување на соработката со ФФМ и се преговара за реализација на нови проекти, а за што се бара поддршка и од Локалната самоуправа.
– Станува збор за фудбалско игралиште со вештачка подлога за кое е потребно да се обезбеди маркица од страна на Општината. Истите тие игралишта ќе се даваат на неколку пати од страна на ФФМ во наредните три години по три игралишта и се надеваме дека Кочани ќе биде град кој што ќе успее да добие едно од тие игралишта, бидејќи како што знаете ние сме еден од ретките градови во Македонија коишто имаат само еден фудбалски терен. Фудбалскиот терен е неопходен пред се за младинските категории, за подобар и непречен развој на фудбалерите. Исто така, работиме на проект за промена на подлогата на стадионот “Никола Мантов“, бидејќи истата има повеќе видови трева, односно трева што не е теренска. За да се замени подлогата неопходно е да се добие дозвола од Министерството за животна средина, пред се да ја искористиме приликата што овде се Осоговските Планини, и од таму да ги искористиме бусените трева за да ги поставиме на нашиот стадион, бидејќи имаме огромна потреба за подобрување на условите за одигрување на натпревари, додаде Крстевски.
Крстевски истакна дека се преоговара со КЈП “Водовод“ да помогне во монтирарњето на пластичните сточлиња на стадионот во Кочани. Притоа нагласи дека очекува веќе во следното коло, кога “Осогово“ ќе игра на домашен терен, публиката да може да ги користи.
Т. Ајтовски
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
