Со две возила и полициско обезбедување денеска во Основниот кривичен суд во Скопје е префрлен предметот од обвинителниот акт со доказните материјали за трагичниот пожар во клубот „Пулс“ во Кочани.
Процедурата се спроведува скоро три недели откако Јавното обвинителство информираше дека обвинението е комплетирано и доставено до Основниот суд во Кочани.
Во меѓувреме, поради недоволниот број судии – само 5, за толку обемен предмет, кочанскиот суд испрати барање до Апелациониот суд во Штип да утврди дали ги исполнува законските услови за оценување на обвинението. Советот за казнени дела при Врховниот суд пак, донесе решение со кое определи целата постапка против 34 физички и три правни лица за случајот „Пулс“ да се води во Скопје.
Со обвинението се опфатени сопственици и управители на угостителски локали, поранешни градоначалници, инспектори, лица од обезбедување и државни службеници. Поради недостиг на докази, постапката беше прекината за 11 лица, од кои двајца се поранешни министри. Од Обвинителството за гонење организиран криминал информираа дека во предметите за кои се преземаат дејствија опфатени се и 27 полициски службеници.
По пренесувањето на предметот и доказниот материјал во Скопје, Кривичниот суд треба да направи оценка на обвинителниот акт, по што ќе може да почне судењето на обвинетите.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
