Присуството на поголем број верници во црквите за време на чествувањето на верскиот празник Мала Богородица не било пречка за крадците повторно да се впуштат во ограбување на верските објекти. Надежите дека токму поради празникот во нив ќе има повеќе пари, бил главниот мотив за сторителите да ја ограбат црквата „Св. Наум Охридски“ во село Чифлик.
Од Црковниот одбор информираа дека случајот е пријавен во полиција и очекуваат соодветна реакција за отркивање и санкционирање на крадците.
-За секој православен празник црквата ве отворена за верниците. Во два наврата парите што се по иконите и иконостасот се собрани од група, чии членови мислам дека се исти. Сакам да апелирам до околните цркви во регионот на сите празници да преземаат мерки од црковните одбори и од полицијата. Кај нас црквата е отворена секоја сабота и недела, а плус и за празниците. Домаќинот е присутен таму, само извесно време оди до дома, поставивме и камера, пријавивме и во полицијата, но немаме никаква реакција, истакна Илчо Нисов, член на Црковниот одбор на Чифлик.
Слична кражба во црквата во Чифлик имало и неодамна, веднаш по прославата на друг верски празник. Мета на крадците и тогаш биле парите, а поради поголемото присуство на верници не е утврден точниот износ што е украден.
Ограбувањето на црквите и другите верски објекти во кочанскиот регион се случува со години наназад. Пари и други предмети беа однесени од црквите во Облешево, Бели, Тркање, а на неколкупати и од црквата „Св. Атанасиј“ во Оризари. Карактеристично е што откривањето на сторителите оди бавно или вооопшто не се завршува.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
