Општата болница со проширена дејност од Кочани обезбеди опрема за компјутерска томографија (КТ), чие инсталирање е во тек и се очекува по соодветните тестирања и испитувања, да биде ставена во функција во најскоро време.
КТ опремата ќе биде во рамки на одделот за рентгенологија, каде претходно беше обезбедена и адаптирана просторија што ќе ги задоволи потребните услови за нејзино функционирање.
-Опремата е донација од Клиниката за неврологија од Скопје, а за реновирање и адаптација на просторот за нејзино инсталирање ние инвестиравме сопствени средства во висина од околу 1,1 милион денари, со оглед што се работи за голема апаратура. Компјутерската томографија ќе биде многу важна, како за Болницата, така и за лекарите кои ќе можат полесно да дијагностицираат одредени болести, но исто така и за пациентите, не само од Кочани, туку и од целиот источен регион и пошироко. Нашите вработени рентген технолози ќе имаат кратка обука за работа со опремата, ќе се направи контрола од државната Дирекција за радијациона сигурност, а ќе се трудиме да го скратиме рокот за да може во што пократок период да почне користењето на компјутерската томографија, истакна Душанка Горгиева Трпевски, в.д. директорка на Општата болница во Кочани.
Брзото откривање и констатирање на состојбата при одредени заболувања и здравствени проблеми е една од главните предности на опремата што за првпат ќе проработи во Општата болница. Таа ќе им стои на располагање на лекарите од различни специјалности, односно за дијагностика при интернистички, ортопедски, хируршки, невролошки и друг вид интервенции.
-За нашата специјалност компјутерската томографија е еден од најзначајните начини за дијагностика, најчесто се користи за снимање на главата со што брзо можат да се детектираат церебро-васкуларните болести, што е една од најчесто третираните патологии на нашето одделение. Може да се користи и за дијагностицирање на малигни болести, заболувања на `рбетниот столб и `рбетниот мозок. Со оваа опрема се овозможува брза, лесна и точна дијагностика на заболување кај пациентите, со што ќе се скрати и времето за лекарска интервенција, истакна Маја Шоповска Китанова, специјалист по неврологија.
По инсталирањето и испитувањето на опремата за компјутерска томографија, таа ќе биде внесена во системот Мој термин, што значи дека освен за пациентите од Кочани и општините од регионот, ќе им стои на располагање и на пациентите од другите населени места во државата.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
