Во рамки на планираните инфраструктурните проекти што во наредниот период треба да се реализираат во општина Зрновци е и изградба на капела со која ќе стопанисува КЈП „Водна кула“. Локалната самоуправа веќе ги презеде почетните активности, при што објави јавен повик за избор на проектант кој ќе ја изработи техничката документација, односно основниот проект што ќе содржи елаборат и ревизија за објектот, а за оваа намена е планирана сума од околу 300 илјади денари.
Капелата ќе биде лоцирана на земјиште во државна сопственост, покрај локалниот пат за Мородвис кај гробиштата во Зрновци. Треба да биде проектирана во согласност со важечките законски одредби, прописи и стандарди за градби од таков тип.
Освен основниот објект, во кој ќе има ладилник со две комори, треба да се планира и простор за кујна со трпезарија, тоалети, магацински простор, трем и просторија за продажба на цвеќе и свеќи.
Поднесувањето на понудите од заинтересираните проектанти е до 26 септември, а рокот за изработка на техничката и проектната документација е 45 дена од доставувањето на писмениот налог од Општина Зрновци до избраниот изведувач.
-По завршувањето на временските рокови согласно законот, очекуваме до крајот на ноември и почетокот на декември документацијата да биде завршена. Ќе се направи и уредување со сервисна улица во должина од 170 метри, што ќе почне идната недела, а се изготвува и проект за бетонски ѕид за оградување на гробиштата, што се реализира по барање од граѓаните, истакна градоначалникот на Зрновци, Борчо Коцев.
Вкупната површина за проектирање изнесува 200 квадратни метри, а објектот треба да е проектиран само за приземје, да се изгради од армирано-бетонска конструкција со термоизолациски метален панел за кровот, прозорците од ПВЦ профили со термопан стакло, а столаријата од дрво. На влезот од капелата треба да се планираат скали, пристапна рампа за лица со потешкотии во движењето, како и пристапен пат со паркинг простор.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
