До крајот на оваа година Општина Зрновци ќе ја комплетира планираната сообраќајна инфрастурктура со изградба и реконструкција на неколку улици во населените места. Веќе е потпишн договор за реализација на градежните работи, а се очекува за неколку дена механизација и работници да излезат на терен.
Градоначалникот на Зрновци, Борчо Коцев истакна дека средствата за изградба и реконструкција на улиците се обезбедени од општинскиот буџет.
– Согласно Програмата за изградба и реконструкција на улици и патишта во општина Зрновци и по спроведената јавна набавка, го потпишавме договорот со избраниот економски оператор, градежната фирма „Стоименов” ДООЕЛ од Кочани, во висина од 3.360.380 денари, за изградба на три нови и реконструкција на повеќе улици во трите населени места. Средствата се обезбедени од буџетот на Општина Зрновци, започнуваме со воведување во работа наредната недела и се надеваме дека временските услови ќе послужат да ги реализираме асфалтирањата до зимскиот период, истакна Коцев.
Според склучениот договор, во план е да се изградат и асфалтираат улицата од мостот кај Влашка маала до селската чешма во Видовиште со должина од 200 метри, потоа улица до левиот брег на Морошка река од 160 метри и проширување на улицата пред училиштето во Мородвис во должина од 80 метри, како и улицата „Скопска“ и паркинг од нејзината северна страна кај гробиштата во Зрновци. Со реконструкцијата ќе бидат опфатени делови од улицата „Скопска“, „Аспарух Манев“ и „Илинденска“ со вкупна должина од над 500 метри.
Според потпишаниот договор, изградбата и реконструкцијата треба да бидат завршени во период од 30 дена по воведувањето на операторот во работните задачи.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
