По спроведената постапка за евалуација на барањата за финансирање на техничка документација за инфраструктурни проекти од областа на животната средина како дел од Третиот повик во рамките на Фондот за техничка документација, Општина Кочани доби известување дека е меѓу четирите добитници на грант до 50.000 американски долари.
Одобрениот проект на Општина Кочани се однесува на изработка на техничка документација за реконструкција на собирниот резервоар и на главниот доводен цевковод за геотермална вода во геотермалниот систем „Геотерма“ – Кочани и е планирано да се реализира во партнерство со КЈП „Водовод“.
Преку проектот „Јакнење на општинските капацитети за имплементација на проекти – Фаза 2“, финансиран од Шведска и Бирото за регионален развој, ќе биде финансирана изработка на потребната техничка документација за реконструкција на дистрибутивниот систем од селото Горни Подлог до ОУ „Никола Карев“ во Кочани, во должина од 7 км.
Проектот вклучува и изработка на основен проект за реконструкција на постојниот собирен резервоар за геотермална вода; изработка на техничка студија за избор на најдобро техничко решение за реконструкција на постојниот дистрибутивен цевковод за геотермална вода; утврдување на потребните количества геотермална енергија за сегашните и идните корисници; анализа за оптимизација на пумпните агрегати во Пумпната станица во Долни Подлог, како и анализа на можностите за поврзување на Градскиот базен на цевководот и планираната изградба на спа-центар и др.
Третиот повик во рамките на Фондот за техничка документација беше спроведен од страна на Програмата за развој на Обединетите нации – УНДП.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
