Членовите на Советот на Општина Кочани дадоа поддршка од општинскиот буџет да се обезбедат 2 милиона денари, односно над 30 илјади евра со кои КЈП „Водовод“ ќе може да набави нова градежна машина.
Ваквата одлука беше донесена на денешната 57. седница на Советот, на која се разгледуваше предлог-буџетот на Општина Кочани за 2025 година.
Расправајќи по предложените буџетски ставки, советниците се согласија наместо планираните средства за привремени вработувања, истите да се пренаменат за набавка на потребната машина за комуналното претпријатие.
На седницата, што беше последна за оваа година, членовите на Советот ги усвоија одлуките за отстапување на трајно управување и користење без надоместок на фотоволтаичните системи на СОУ „Гошо Викентиев“, на КЈП „Водовод“ и на ООУ „Никола Карев“. Исто така, беше усвоен Интегрираниот локален развоен план на Општина Кочани за периодот 2024 – 2027.
На 57. седница на Советот, советниците го усвоија Буџетот на Општината за наредната, 2025 година.
Пред самиот крај на седницата, советниците од опозицијата ја напуштија и излегоа од салата. Поради тоа градоначалникот Љупчо Папазов, иако имаше подготвено годишно обраќање за реализираните активности во оваа година и планираните проекти за иддната 2025 година, не го презентираше пред останатите советници во салата.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
