Денеска во просториите на скопската општина Карпош беше потпишан меморандум за соработка со Општина Кочани.
Документот го потпишаа градоначалникот Стевчо Јакимовски и в.д. градоначалникот Венко Крстевски, а на средбата се разговарало за актуелни теми поврзани со урбанизмот, инспекцискиот надзор, и заштитата и спасувањето.
-Кочани се соочува со предизвици, но има волја, визија и тим што сака да напредува. Нашите служби од Карпош ќе помогнат со знаење, искуство и срце. Без политика, без калкулации, само човек за човек. Ние како локална власт ќе помогнеме сé што можеме во делот на инспекцискиот надзор, во делот на собирање на приходи, при развој на комуналната инфраструктура, урбанизмот, како и во обидот да се привлечат инвеститори, бидејќи верувам дека на Кочани сега тоа му е навистина потребно, истакна градоначалникот Јакимовски.
Во име на жителите на општина Кочани, в.д. градоначалникот Крстевски нагласи дека никогаш нема да биде заборавена пријателски подадената рака од Јакимовски и карпошани.
-Благодарение на Општина Карпош ние за првпат во историјата ќе добиеме инспектор за домување, кој е од особена важност за нас во овие тешки моменти. Исто така во делот за безбедноста, добредојдена е помошта од Карпош бидејќи сé уште постојат објекти во Кочани каде што тлее таа опасност. Претставници од двете локални самоуправи исто така ќе учествуваат во заеднички проекти и иницијативи од заеднички интерес, со отворена можност за размена на стручни кадри и експертска поддршка по потреба. На овој начин ќе се подобри квалитетот на услугите кон граѓаните и ќе се зголеми ефикасноста во планирањето и реализацијата на урбаните решенија. Преку заедничката соработка ќе се унапреди инспекцискиот надзор со размена на практики и методологии и конечно ќе се зајакнат капацитетите за делување во вонредни состојби кои директно ќе влијаат во насока на заштита на населението и материјалните добра, истакна Крстевски.
Меморандумот за соработка со Општина Карпош е втор, откако претходно ист документ беше потпишан и со Локалната самоуправа на Струмица, а следната соработка ќе биде договорена со Општина Кавадарци.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
