Со измерена активна транспарентност во работењето од 94,3 отсто, Локалната самоуправа на Кочани се наоѓа во групата на општини и државни институции со многу добра транспарентност. Со тоа, петта година по ред таа е во врвот меѓу општините од Источниот регион.
Резултатите се објавени во Индексот за активна транспарентност за 2024 година што го изработи Центарот за граѓански комуникации од Скопје, испитувајќи ја јавноста во работењето на општините и на државните институциии, односно на сите министерства во текот на оваа година.
Според јавно објавените податоци, меѓу сите институции во државата кои биле предмет на истражувањето, Локалната самоуправа на Кочани го дели 17. место со Општина Делчево, која има идентичен процент на активна транспарентност, а заедно го делат 13. место кога се споредуваат сите општини во државата.
Меѓу 11-те општини од Источниот регион, пред Кочани и Делчево е Општина Берово со измерена транспарентност од 100 отсто и таа е прва меѓу сите општини и државни институции.
Општина Штип со 91,7 отсто и Општина Зрновци со 89,9 отсто се наоѓаат на 26, односно 36 место на листата. Активната транспарентност на Општина Виница пак, е измерена на 86,6 отсто, колку што има и Македонска Каменица, а двете општини го делат 38. место. Потоа следуваат Карбинци со 85,5 и Пробиштип со 82,9 отсто. На средината на табелата, во групата со добра транспарентност се општините Чешиново-Облешево со 79,7 отсто и Пехчево со 70 отсто.
Во анализата на Центарот за граѓански комуникации се истакнува дека Источниот регион ја задржал, па дури и ја подобрил лидерската позиција во однос на другите региони, со 88 отсто активна транспарентност.
Истражувањето се прави осма година по ред, врз основа на претходно изработена методологија и структурирани прашалници за исполнувањето на обврските за активно објавување на информациите на интернет-страниците на општините.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
