Голем црковно-народен собир се одржа денеска во Блатец, на кој беше осветен манастирот „Рождество на Пресвета Богородица“. Осветувањето на црковниот храм, чија изградба траеше повеќе години, го изврши митрополитот брегалнички Иларион во сослужение на свештеници од парохијата.
На светиот чин присуствуваа голем број верници од Блатец, Виница, но и од соседните општини, како и блатчани кои живеат во други градови и држави.
-Завршувањето на изградбата и осветувањето е голем чин за селото , но и за нас кои вложувавме големи напори сите овие години. На почетокот овде беше обичен извор, кладенец, со тек на времето се градеше, доградуваше и сега е завршен, со фасада, настрешница, внатре има насликано фрески и сѐ што е потребно. Во разговор со владиката Иларион одлучивме на денешниот ден да го осветиме, истакна Јордан Костадинов, претседател на Црковниот одбор на црквата „Свети пророк Илија“ од Блатец.
Сместен на одлична локација, на падините на Плачковица, манастирот заедно со неговата околина нуди можности за одмор, а тоа беше искористено и за организирање на иселеничка средба на жителите од овој крај, кои повеќе години живеат и работат во странство.
-Минатата година оваа средба на печалбарите се одржа за првпат, а еве сега ја повторуваме и сакаме да стане традиционална. Голем број од присутните овде донираа и своја помош за изградба на манастирот, затоа што „каменот си тежи на местото“, а тие се тука родени, крстени, венчани и не дај Боже за други околности. Водата што извира овде народот ја смета за лековита и ја користи за проблеми со очите, се мијат со неа, а има луѓе кои се враќаат пак, затоа што велат дека „си го нашле чарето“. Овде се одржа и ловечка средба, а за секој викенд има многу посетители. Малку е проблем пристапот со патот, како и електричната енергија, имаме ветувања од Општина Виница дека ќе се среди, па очекуваме да биде и тоа, додава Костадинов.
-Со Божји благослов, на денешниот ден се собравме овде, бидејќи привршивме со подготовките за осветување на манастирот, решивме да го поканиме надлежниот архиереј Иларион да го изврши осветот и заедно да се направи собирот со иселениците. Сметавме дека најголем број од луѓето во дијаспората во овој период се во родниот крај, затоа одлучивме да се соберат и на молитва и на осветувањето, истакна Орце Пешов, свештеник од Блатец.
Собирот на иселениците од Блатец и околните населени места во Виничко ќе пресрасне во традиционален, со намера да се одржува на верскиот празник посветен на Св. вмч. Марина.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
