Археолошкиот музеј на Македонија – Скопје, во соработка со библиотеката „Искра“ од Кочани носител на проектот „Бисери од културното наследство на Кочанската Котлина“ во кој се вклучени учениците од кочанските училишта, како и од Школата за цртање и сликање при ЦК „Бели мугри“.
Тие твореа на мотиви од старата архитектура во урбаната и руралните средини, со цел да се зачува старото културно наследство, а нивните дела денеска беа претставени на изложба што беше отворена во просториите на Библиотеката.
– Тоа е проект којшто трае дваесетина години наназад и со кој се обидуваме да го презентираме културното наследство од Кочанската Котлина, од причина што во Кочани, за жал сѐ уште не постои музеј, а Археолошкиот музеј се обидува на тој начин да ги отвори вратите и музејот да го однесе кај учениците. Самиот проект е замислен како едукативна работилница во којашто прво им го презентираме културното наследство на учениците, а потоа тие сами ги прават творбите, во зависност од тоа како го доживеале тоа што го виделе. Оваа година малку го намаливме бројот на учениците, имаме само петнаесетина ученици коишто твореа, а темата беше руралното и урбаното профано градителство од крајот на 19 и почетокот на 20 век, истакна Илинка Атанасова, археолог кустос советник во Археолошкиoт музеј на Македонија.
На изложбата се претставени дваесетина дела, работени во графика и акварелна техника, а на кои доминираат препознатливи објекти во Кочани и околината, кои поради дотраеност полека исчезнуваат неповратно.
Изложените дела ќе можат да се видат во наредните десетина дена во текот на работното време на библиотеката „Искра“.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
