Драстично опаѓање од околу 55 отсто бележат капиталните расходи што ги реализирала Општина Кочани во последните три години. Според извештајот за реализација на средствата од буџетската сметка само за последниот квартал од минатата година, забележливо е дека дури и планираните средства за оваа намена не се целосно реализирани, односно во просек за сите ставки се потрошени нешто повеќе од 65 отсто.
Најголем дел од средствата наменети за капитални инвестиции лани биле вложени за уредување на градежното земјиште и во енергетската ефикасност, каде реализацијата од околу 19 милиони денари била целосна. Инвестииците за изградба на јавно осветлување и изградба и реконструкција на локални патишта и улици е под 60 отсто.
Намалувањето на буџетските срдства за изградба и реконструкција на инфраструктурни објекти, набавка на опрема и други капитални инвестиции, директно се одразува врз растот и развојот на локалната заедница, како во однос на подобрување на условите за живеење на населението, така и во создавање услови за остварување приходи во иднина.
На последната седница на Советот на Општина Кочани имаше советничка забелешка за сериозното намалување на реализацијата на капиталните расходи од година во година, со констатација дека тоа го загрозува целокупниот развој на општината.
-Јас извадив споредба со претходните години во однос на капиталните расходи, во 2021 година ја имаме завршено со реализација од 180 милиони денари, во 2022 година паѓаме на 113 милиони, а лани завршивме со 82 милиона денари. Тоа е катастрофа. Тие капитални расходи се од битно значење за развојот на една општина, каде што се гледа нејзиниот развој. За жал, ние имаме тенденција на значително намалување на тие трошоци. Се надевам дека оваа година ќе имаме барем нешто поголеми инвестиции, за да се оправда градоначалникот пред граѓаните, истакна Ивица Лазаров, член на Советот на Општина Кочани.
Градоначалникот Папазов не беше присутен на седницата, а од општинската администрација не дадоа никакво образложение на што се должи падот на капиталните расходи, ниту анализа како тоа се одразува на развојот на општината.
Во буџетот за оваа година, што Советот на Општина Кочани го усвои на крајот на минатата, износот на капитални инвестиции е планиран на нивото од пред три години. Дали неговата реализација ќе го следи досегашниот тренд и со колку проценти ќе се исполни планираното, ќе биде познато на крајот од годината.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
