Памела Ивановска од СОУ „Љупчо Сантов“ го освои првото место од жири комисијата во категоријата средношколци на 12. Ораторски вечери на Универзитетот „Гоце Делчев“, чиј организатор е Правниот факултет од Штип. Таа, заедно со соученичките Даниела Алчинова, Ексенија Јанева и Илина Донева, се најде во финалето во кое имаше вкупно седум средношколци.
Низ слоганот „Размислувај слободно, зборувај гласно“, тие во своите говори на слободна тема, со сигурен став зад говорницата, ги истакнаа нивните критички погледи кон проблемите и аномалиите во нашето опкружување.
Памела говореше за лична загуба на член од своето семејство, осудувајќи го системот и жестоко напаѓајќи ги неправилностите на Одделението за онкологија, што беше актуелен настан по медиумите. Потресна приказна која нејзе ѝ донесе мала сатисфакција и огромна победа за нејзината храброст.
Даниела јавно го обелодени „македонскиот политички театар“, вклучувајќи инвентивен потег во настапот со еден препознатлив реквизит. Ексенија низ сатира и умешна интонација го исмеа македонскиот менталитет. Илина критички се осврна на темата за менталното здравје.
-Настанот се одржа во полниот амфитеатар на Економскиот факултет во Штип. Ораторите се натпреваруваа во две категории: средношколци и студенти. Од вкупно седум средношколци кои влегоа во финалето, наши ученици, претставници на СОУ „Љупчо Сантов“, беа дури четворица, а да се потсетиме, истиот сооднос го имавме и на ланската финална вечер. Нашето училиште со посебна гордост ја истакнува и овогодинешната победа. Лани нашиот најдобар оратор Ивона Тодорова ја зема првата награда од публиката, а овој пат нашиот најдобар оратор Памела Ивановска е неприкосновен победник од жири-комисијата. Ваквиот успех низ спортска терминологија е познат како „дабл учинок“, истакнуваат од СОУ „Љупчо Сантов“.
Честитки до сите наши оратори! Негуваме и докажуваме таленти, подготвувајќи од нив гласноговорници кои се одважуваат да зборуваат на теми за кои јавноста и институциите честопати премолчуваат, додаваат од кочанското средно училиште.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
