Учениците од основните училишта во Кочани, како и од Училиштето за сликање и цртање при ЦК „Бели мугри“ се наградени на меѓународниот ликовен конкурс во рамки на Интернационалниот натпревар за сликање на млади – Јангцу, што се одржува во НР Кина.
Учеството на конкурсот е во соработка со Општина Кочани и збратимениот кинески град Вуши, при што на пригодна свеченост им беа доделени наградите и признанијата на учениците чии творби биле оценети како најдобри.
-Од нашата општина учествуваа 18 ученици и 5 нивни ментори. Од вкупно 2.000 пристигнати цртежи на конкурсот, нашите ученици освоија 3 трети, една втора и една прва награда, истакна Лилјана Арсова од Општина Кочани.
-Јас сум Ведрана Лазарова, имам осум години, член сум на Училиштето за цртање и сликање. Учествував на конкурсот во Кина и добив прва награда.
Градоначалникот Љупчо Папазов, им честиташе на учениците и порача дека соработката на културен план со НР Кина ќе продолжи.
-Сакам да честитам за вашиот труд и желба да создавате, да творите, да го афирмирате пријателството што постои долги години меѓу Кина и Македонија, односно меѓу збратимените градови Кочани и Вуши. Овој начин на соработка, преку културата и ликовното творење ќе придонесе за уште поголеми можности и форми за соработка. Ова нека биде симболично, и веќе традиционално, да продолжи и да биде мотив за сите вас да станете успешни во правецот што сте го определиле во редовната наставна програма и во ликовната уметност, истакна Папазов.
Зададената тема на меѓународниот ликовен конкурс на која твореа учениците од целиот свет годинава беше повик за глобален мир на планетата Земја. Ликовните творби беа изработени во најразлични сликарски техники, од акварел до акрил.
На меѓународниот ликовен конкурс во Јангцу, НР Кина, годинава учествуваа 2.000 училишта и над 100 градови партнери од 50 земји ширум светот.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
