По 10 часа интервенција ставен е под контрола пожарот во атарот на селата Соколарци, Врбица и Рајчани, што избувна вчера околу пладне.
Во гаснењето интервенираа екипите на Територијалната противпожарна единица и Доброволното противпожарно друштво од Кочани, кои добија поддршка и од специјализираните авиони за гаснење пожари „ер трактор“ на Дирекцијата за заштита и спасување, како и хеликоптери на Министерството за внатрешни работи. Исто така, во гаснењето учествуваа и ТППЕ – Штип и ТППЕ – Свети Николе, вработени во ЈП „Национални шуми“, како и поголем број жители на околните села.
Според првичните проценки опожарена е површина од над 250 хектари, главно нискостеблеста шума и грмушки, но поради непристапноста на теренот и сувата трева, во опасност беа доведени манастирот „Св. Ѓорѓи“ кај Соколарци, неколку сточарски објекти, но и дел од куќите во селото Врбица. И покрај локализирањето на огнот, еден крак во текот на доцните вечерни часови се проширил во правец на пробиштипското село Бунеш, но со соодветна интервенција спречено е повторно разгорување на пожарот.
На теренот каде што се појави пожарот беше и директорот на Центарот за управување со кризи, Стојанче Ангелов кој нагласи дека поради сувата трева огнот се разгорувал многу брзо, а ветерот помогнал огнот да се прошири на различни страни.
– Горат и трња, што се исто така лесно запаливи. Од тие причини, да не биде загрозено некое од локалните села, ангажирани се три „ер-трактори“ на Дирекцијата за заштита и спасување, а делуваа и два хеликоптера на Министерството за внатрешни работи, истакна Ангелов.
Од противпожарните единици, како и од надлежните служби и од Општина Чешиново-Облешево упатија апел до месното население за поголемо внимание при палење оган на отворен простор, за да се избегнат материјални штети и посериозни последици по здравјето и животот на луѓето.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
