Нова, повисока цена доби геотермалната вода од системот „Геотерма“ на кочански „Водовод“, со што наместо досегашните 61,90 денари за еден метар кубен, корисниците во иднина ќе плаќаат по 63,15 денари.
Покачувањето е направено поради усогласување со висината на концесискиот надоместок што се плаќа на сметката на Министерството за финансии за користење на минералните суровини, а во овој случај тоа е геотермалната вода.
Согласност на барањето од Управниот одбор за пораст на надоместокот, со 15 гласа „за“ даде Советот на Општина Кочани на вчерашната 9. Седница, на која се разгледуваше Планот за работа – активности на КЈП „Водовод“ за 2026 година.
За десетгодишниот период, од јануари 2016 до јануари 2026 година, цената на геотермалната вода од „Геотерма“ е покачена за 99,8 отсто. Со тоа, и онака малиот број субјекти кои останаа да ја користат како енергенс за затоплување, се принудени дополнително да го одврзат „ќесето“ или пак да ги откажат договорите и да преминат на други извори за добивање топлинска енергија.
Последен пат поскапување на геотермалната вода од над 83 отсто беше направено во ноември 2022 година, кога од 33,82 денари цената скокна на 61,90 денари за кубен метар. Од „Водовод“ тогаш дадоа образложение дека порастот е поради најавената регулирана цена на електричната енергија за комуналните претпријатија од страна на Регулаторната комисија за енергетика, што бил клучен елемент при утврдувањето на трошоците за испорака на водата.
Дополнително, беше наведено дека се планира поправка на постојната и набавка на нова пумпа за црпење, обновување на изолацијата на цевководот за дистрибуција на геотермалната вода, како и зголемени трошоци за плати на вработените врз основа на законската регулатива за минимална плата.
Пред четири години „Водовод“ имаше потпишано преддоговори со 14 правни лица кои геотермалната вода ја користат како енергенс за затоплување, односно училишта и јавни институции, како и оранжериски комплекси и други стопански субјекти, но покачувањето на цената беше главна причина дел од нив да се откажат од услугите на работната единица „Геотерма“.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
