Полициската станица во Виница уште извесен период ќе остане без командир, откако Советот на Општината на денешната 25 редовна седница не даде мнозинска поддршка за ниту еден од тројцата предложени кандидати.
Министерството за внатрешни работи пред десетина дена достави листа со имињата и кратка биографија за вработените во службата што ги предлага за командир на униформираните полициски службеници во Виница. Кандидати беа Столе Алексов од Кочани и штипјаните Влатко Гигов и Влатко Наумов, кои според образложението ги исполнуваат законските услови за извршување на функцијата, а од нив советниците во рок од две недели по доставувањето на листата требаше да изберат еден.
На седницата имаше кратко образложение за одлуката на Комисијата за мандатни прашања и именувања, според која е дадено позитивно мислење за кандидатот Столе Алексов, за кого поддршка имаше и од градоначалникот Миле Петков.
-Дадов предлог на Комисијата за командир на Полициската станица да биде избран Столе Алексов затоа што го познавам затоа што овде работи, а другите двајца не знам во кој полициска станица се вработени. Од таа причина како предлог го дадов да дојде на Совет за да се изјасне и да заземе став по ова прашање. Во однос на прашањето дали постапката во Министерството е направена согласно закон, ние ниту знаеме, ниту сме должни да коментираме, листата е дадена и ние треба во согласност со неа да се произнесеме, односно да изгласаме или да не изгласаме, истакна Зоран Ристовски, член на Советот на Општина Виница.
-Апсолутно стојам на ставот на советникот Ристовски за предлгот за Столе Алексов, затоа што лично го знам, а според информациите се работи за голем професионалец кој во голем дел има разрешено кривични дела во општина Виница. Полицијата е деполитизирана и треба да избереме човек професионалец за да се зголеми безбедноста во градот, тоа е мое лично мислење, а вие одлучувате за тоа, истакна градоначалникот Петков.
По дискусијата околу предложените кандидати требаше да се премине на гласање, но процедурално беше побарана пауза од десетина минути. Продолжението н седницата по паузата покажа дека гласањето нема да се одвива според претходните дискусии. Кандидатот Столе Алексов, кој беше прв на листата, доби седум гласа „за“, додека осуммина советници беа воздржани. Со оглед дека можеше да се гласа само еднаш, кандидатурата на другите двајца ни не доби можност да се разгледува.
По ваквиот епилог, Министерството за внатрешни работи ќе мора да испрати друга листа за да може на следна седница да се избере командир на Полициската станица во Виница.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
