Со полнењето на нивите во атарот на Кочани, денеска вработените во водостопанската подружница „Брегалница“ официјално ја почнаа наводнителната сезона на оризовите полиња во регионот.
Водата од каналската мрежа навлезе во парцелите во месноста Сазл’к, каде со ориз оваа пролет треба да се засеат околу 300 хектари.
-За почеток ја користиме проточната вода од Оризарска и Кочанска Река, со што ќе се заштедат количините што се акумулирани во браната Калиманци. Според последните мерења, во моментот таа располага со околу околу две третини од вкупниот капацитет, односно има околу 75 милиони кубни метри вода. Оптимисти сме дека со таа количина, но и со тековниот доток на вода, ќе се овозможи исполнување на поголем дел од планот за сеидба со ориз. Сепак, јасно е дека поради лошата хидролошка состојба оризовите полиња во одделни атари ќе бидат исклучени од наводнување, истакна Славе Петров, контролор за наводнување во ВП „Брегалница“.
Обработката и подготовката на парцелите пред почетокот на сеидбата скоро целосно е завршена, земјоделците ги третираат со вештачки ѓубрива, а и покрај недоволната механизација, главната каналска мрежа за наводнување е оспособена да ги прифати потребните количини вода.
Според планот, водата од акумулацијата Калиманци треба да биде пуштена во средината на мај, кога ќе почне и полнењето на нивните во атарите на подалечните села Спанчево и Соколарци.
Од водостопанската подружница „Брегалница“ имаат забелешка кон земјоделците од Големо Поле во атарот на Оризари, кои иако ги подготвиле нивите за сеидба, не сакаат да ја прифатат водата и таа неискористена истекува во речните корита. Претходно им била доставена писмена информација за датумот кога ќе почне полнењето на нивите, но од непознати причини тие не одговориле позитивно на повикот.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
