Основното училиште „Никола Карев“ беше домаќин на несекојдневна презентација на вселенските тела и на историјатот на човековото освојување на небесните пространства, од почетоците до денес.
Во соработка со астрономскиот и аеро клуб „Фрањо Клуз“ од Земун, Република Србија, на презентацијата во училишната спортска сала преку експонати, прикази и ѕвездено небо на мал мобилен планетариум, учениците од 8 и 9 одделение имаа можност да го прошират своите сознанија и да добијат нови информации за развојот на астрономијата и истражувањето и патувањето на човекот во вселената.
Ваквите воннаставни активности се со цел да се анимираат децата и да се зголеми нивниот интерес за географската наука, при што се користат практични методи за приближување на небеските тела.
-За жал, во нашите училишта ова се учи само површно, порано имавме можност да го посетуваме Планетариумот во Скопје, меѓутоа сега условите се усложнети, патувањето е скратено и ова е една можност којашто треба да ја имаат сите деца. Значи, не мора во овој обем, меѓутоа мини планетариум би можело да има опремено во секое училиште. Бидејќи нема, уште поголемо значење добива посетата од астрономскиот клуб. Моментално се организираат неколку групи од нашето училиште, а гледам дека има преговори со директорите од другите училишта. Веројатно ќе се договорат, бидејќи во еден ден не може да се опфатат сите училишта. Има многу опрема, дојдени се со возило и отприлика еден час, околу шеесетина минути трае и не би можело да се опфатат повеќе ученици во еден ден, истакна Сашко Стефановски, професор по географија во ОУ „Никола Карев“.
Преку непосредна комуникација на учениците со претставник од астрономскиот клуб од Земун, беше објаснеата исконската желба на човекот што повеќе да ја запознае вселената, да ги открие нејзините тајни и да навлезе што подлабоко во неа.
Пред младите основци беа прикажани макети на ракетите со кои се освојувале вселенските пространства, од почетоците, преку слетувањето на Месечината до откривањето на нови планети и други небесни тела со помош на современи телескопи и друга опрема.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
