Родителите на загинатите во „Пулс“ и Здружението „16 март 2025 – Кочани“ ги прекинуваат секојдневните едночасовни блокади на сообраќајот на кружниот тек на двојниот мост на булеварот „Стево Теодосиевски“.
Одлуката за прекинот е донесена откако Основниот кривичен суд –Скопје денеска соопшти дека судењето за предметот „Пулс“ ќе почне на 19 ноември. Сепак, родителите ќе продолжат со организирањето на саботниот „Марш за ангелите“.
-Бидејќи добивме датуми за рочишта, ве известуваме дека секојдневните блокади ќе бидат привремено прекинати, но со Маршевите продолжуваме секоја сабота – како симбол на нашата упорност и борба за вистината. Ние, родителите и семејствата на починатите деца, соопштуваме дека со големо внимание ќе го следиме судскиот процес, со единствена цел – да се открие вистината и да се обезбеди правдата за младите животи што беа изгубени во трагедијата што засекогаш го промени нашето општество, се истакнува во известувањето на родителите.
Во образложението за прекинот на блокадата на сообраќајот родителите нагласуваат дека во овој случај не се работи само за судење за пожарот, туку тоа е судски процес за нехуманите постапки.
-Нашата болка е вечна, но нашата борба е и за сите идни генерации – никогаш повеќе да не се повтори ваква трагедија. Бараме јавноста, медиумите и институциите да го следат овој процес со должно внимание, бидејќи ова не е само судење за еден пожар – ова е судење за човечноста, совеста и одговорноста, додаваат родителите на загинатите.
Денеска се одбележуваат точно седум месеци од трагедијата на 16 март во која директно настрадаа 63 млади, а повредени беа над 200 лица.
Судскиот прoцес ќе се спрoведе во судницата во рамки на затворот „Идризово“, а првото рочиште на 19 ноември ќе почне во 9:30 часот.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
