Центарот за европска граѓанска иницијатива од Кочани во изминатиот период реализираше истражување во општините Штип, Кочани, Виница, Чешиново- Облешево и Зрновци поврзано со правата на лицата со попреченост на локано ниво.
По сумирањето на податоците од истражувањето, тие беа претставени на работилница што се одржа во Кочани, а на која се дискутираше и за дополнителните предизвици со кои се соочуваат институциите, граѓанските здуженија и лицата со попреченост.
-Главната цел на ова истражување беше да се даде придонес кон универзалниот периодичен извештај на ОН и ние всушност учествувавме со наши препораки од два аспекта – недискриминација и права на лица со попреченост. На локално ниво беа опфатени аспектите на инклузија на учениците во образовниот процес, пристапноста на локалната инфраструктура и порблематиката што се однесува на кризниот менаџмент. На национално ниво беа опфатени аспектите на избирачкото право и недискриминацијата. Сознанијата до кои дојдовме е дека има недоволен број образовни асистенти, нивната квалификација треба да биде подобрена, зборувавме и за пристапноста на училиштата, недостатокот од асистивна технологија, превозот на учениците, предизвиците со кои се соочуваат наставниците, стручните служби и родителите. Исто така, стана збор и за надлежностите што ги имаат општините во делот на локалната инфраструктура, како државата да придонесе за подобрување на пристапноста на објектите и инфраструктурата. Отвораме и ново прашање, што досега не е толку обработено, а се однесува на лица со попреченост во ситуации на кризи, односно природни непогоди и катастрофи, од проценка на ризикот, преку раното предупредување, евакуацијата и заштитата, истакна Јован Ананиев, претседател на Центарот за европска граѓанска иницијатива – Кочани.
Податоците во истражувањето се добиени со помош на документација, интервјуа, анкети и фокус групи во рамки на проектот „Остварувањето на правата на лицата со попреченост на национално и локално ниво“, поддржан од грантовата шема „Човековите права во практиката“, спроведувана од Институтот за европска политика и финансирана од Европската Унија.
Клучните наоди и препораки од дебатата ќе бидат дел од финалниот истражувачки извештај, којшто има за цел да претставува основа за креирање на политики базирани на податоци, а ќе се достават до локалните самоуправи, до националните власти и до ЕУ.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
