– Околу 40 проценти од планираните работи за изградба на станицата за пречистување на отпадните води се завршени и очекувам дека проектот ќе биде завршен навреме, односно до крајот на оваа година. Што се однесува до колекторскиот систем, односно поставувањето на цевките, досега е реализирано околу 80 отсто од планираното. Тоа значи дека направено е поврзување на старите колекторски испусти од Кочани со новиот систем. Има извесно пролонгирање со приклучувањето на одделни места, но генерално кажано проектот треба да биде ставен во функција најрано идната година напролет, рече Рето Бухлер, претставник на консултантската куќа “Ернст Баслер и Партнер“.
Регионалниот концепт за третман на отпадните води е една од главните карактеристики на целата инвестиција што е поддржана од швајцарската влада. Дополнителна потврда за тоа даде и амбасадорката на Швајцарија, Сибиле Сутер Тејада при нејзината посета на Кочани по повод одбележувањето на 50-годишниот јубилеј на КЈП “Водовод“. Според неа, се размислува за можно приклучување на колекторскиот систем на Виница и на околните места, на пречистителната станица кај Мојанци.
Претставникот на швајцарскиот консултант вели дека освен во изградбата на објектот, тие му даваат и друг вид помош на кочанското комунално претпријатие.
– Планот се почитува, а заедно со техничкиот проект ние му даваме поддршка на “Водовод“ во извесни организациски подобрувања, особено во подобрувањето на базата со податоци за корисниците и доставувањето на сметките, за да се подобрат приходите на претпријатието, додава Бухлер.
Пречистителната станица кај Мојанци и колекторскиот систем за отпадни води се градат со финансиската помош од Владата на Швајцарија преку Агенцијата за развој и соработка – СЕКО, која обезбеди грант од 21 милион швајцарски франци, а остатокот од околу 2 милиони евра се од буџетот на Република Македонија.
Т. Ајтовски
{fshare}
https://www.youtube.com/watch?v=TQ4Bl3KX438
{backbutton}
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
