Трета година по ред кикбоксерот Лука Змејкоски, член на кикбокс клубот „Лидер“, го доби признанието за најдобар спортист на општина Виница за 2024 година.
На манифестацијата „Спортски асови“ што вечерва ја организираше Општина Виница, беа доделени повеќе награди и признанија за спортистите и екипите кои постигнале забележителни резултати.
-Сакам да им честитам за постигањата на нашите спортисти во 2024 година, за што сме многу горди горди, бидејќи на ваков начин го промовираат спортскиот дух и спортската култура, а со тоа ги мотивираат младите да се занимаваат со спорт. Општина Виница отсекогаш имала добри спортисти кои низ времето оставиле трајни вредности, на кои и денес се гордееме. И денес имаме спортисти кои постигнуваат значајни резултати и се вистински промотори на општината во земјата и странство. Радува фактот што голем број млади активно се занимаваат со спорт, почнувајќи од училишните спортски екипи, па сè до клубовите кои се натпреваруваат во домашните првенства и на меѓународни натпревари, истакна Миле Петков, градоначалник на Виница.
Кикбоксерот Змејкоски го освои првото место на Државното првенство, а на врвот е и на меѓународната сцена што пред неколку дена го потврди со освојувањето на златниот медал на Европскиот кикбокс куп во Бугарија.
– Предизвик ми беше да ја задржам мојата позиција на светската ранг листа, тоа е местото број еден. Сега сум на првото место и се надевам дека таму ќе останам. Имав тешки противници во Бугарија, со бугарскиот кикбоксер во полуфиналето не беше тешко оти тој не беше искусен, но во финалето противникот од Молдавија беше доста искусен, а потврда е што три пати е европски шампион. За наредниот период се надевам дека во април ќе настапам во Сараево на Европски куп, во мај има натпревар во Загреб, а летово има и Европско првенство. Можам да кажам дека во мојата категорија има доста тешки противници од скоро сите земји во светот, истакна Змејкоски.
Признанието за најдобар тренер, четврта година по ред, му припадна на Дарко Гоцевски од кикбокс клубот „Лидер“, кој е и најзаслужен за успехот на Змејкоски.
-Оваа награда е мотивација за да продолжиме понатаму со успесите, да продолжиме да градиме млади и здрави спортисти и да остваруваат резултати. Со успехот на Лука кикбоксот добива сѐ повеќе на популарност, еве во последните неколку години можеме да кажеме дека тој е спорт број еден во Македонија. Лука оваа година оствари извонреден резултат, зема второ место на Светското јуниорско првенство, а моментално се наоѓа на првата позиција на ранг листата. Отворивме секција и во Кочани, сакаме младите да почнат да спортуваат, да остваруваат резултати, а групата таму ни работи во понеделник, среда и четврток од 20:15 часот и апелираме кој сака да дојде да спортува, истакна Гоцевски.
Фудбалскиот ветеран Драгослав Здравков, кој сѐ уште е активен член на „Слога 1934“, доби признание за особен придонес во развојот на фудбалот во општината.
Зоран Васевски од ФК „Слога“ доби награда за најдобар спортски работник, а во образложението беше нагласено дека тоа е признание за неговиот придонес за развојот на клубот од неговото обновување до денес. Од оправдани причини тој не беше присутен на доделувањето на признанието, но во писмената порака до присутните нагласи дека паричните средства од наградата ќе ги отстапи на штитениците од Дневниот центар за деца со посебни потреби во Виница.
Признание и вредносен ваучер за најдобар млад спортист доби Петар Захариев, член на ФК „Слога 1934“, а за најдобра млада спортистка Стефанија Веселинова од КБК „Лидер“.
ФК „Слога 1934“ е избрана за најдобра во категоријата спортски екипи, а признанија за постигнати високи резултати и промовирање на општината во областа на спортот добија младите спортисти Анастасиј Гоцевски, Нела Петреска, Борис Митревски, Нина Колева и Анастасија Андонова.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
