Во Виница се одржа завршната сесија од проектниот Форум во заедницата, на која присутните граѓани најголема поддршка дадоа за предлогот за набавка на возило за собирање комунален отпад, како еден од петте предлог-проекти што беа избрани на претходните работни средби.
За реализација на проектот е обезбедена грант поддршка од УНДП во висина од 50 илјади американски долари, а дополнително Општина Виница ќе кофинансира со средства од сопствениот буџет.
-Уште на првата форумска сесија што се одржа пред околу два месеца, граѓаните одбраа проектите да бидат од сферата на заштитата на животната средина, а денеска изгласаа да се набави ново возило за собирање на комуналниот отпад. За останатите предложени проекти, што исто така се од интерес за пошироката заедница, но за кои немаше доволно број гласови од присутните на форумската сесија, беа дадени препораки до Локалната самоуправа да ги реализира во наредниот период со сопствени средства. Сега преостанува да се подготви потребната документација и да се објави јавна набавка, а крајниот рок за реализација на проектот е до почетокот на октомври годинава, истакна Тодор Цоневски, комодератор на форумската сесија.
Останатите препораки што произлегоа од форумската сесија се однесуваат на изградба на енергетско ефикасни фасади и покриви на јавните објекти во општината, промена на уличното осветлување со штедливи светилки, набавка на контејнери за селекција на отпадот и за изградба на пешачка патека до месноста Чупино. Исто така, граѓаните побараа од Локалната самоуправа да ги продолжи активностите за приклучувње на општинската фекална канализација на системот за пречистување на отпадните води кај Кочани, како и да направи напори за изградба на стационар за бездомни кучиња и да обезбеди осветлување за спортските игралишта.
Виница е една од десетте општина во државата кои се опфатени со втората фаза на проектот „Зајакнување на општинските совети“, што се реализира во рамки на Програмата за развој на Обединетите нации – УНДП, Швајцарската влада и Министерството за локална самоуправа.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
