Во Мултикултурниот центар во Кочани денеска беше промовирана книгата „Протојереј Миладин Михаилов – живот посветен на молитвата“ од авторите Ленче Стоименова и м-р Марјан Гијовски.
Промоцијата на книгата предизвика голем интерес, а салата беше премала да ги собере граѓаните.
Книгата е поделена во четири дела, а првиот е воведот во кој се објаснува како и зошто настанала книгата. Потоа ги содржи личните кажувања на отецот Миладин, случувањата од неговиот црковен живот и за крај вметнати се и кажувањата од обичниот народ за свештеникот.
-Идејата да ја созададам книгата дојде сосема случајно. Мотивот долги години беше жив во мојата глава, но ете магистер Маријан Гијовски дојде еден ден случајно кај нас и оттука почнаа да се собираат материјалите. Податоците се прибираа неколку години, а во последната година успеавме само за неколку месеци да ги собереме материјалите. Сето тоа што го собиравме неколку години го напишамвме на лист хартија и го овековечивме, истакна Ленче Стоименова, коавторка на книгата.
-Оваа личност беше многу интересна, уште кога прв пат го запознав ми го предизвика професионалното внимание како историчар. Тој живеел во едно атеистичко општество и имал голема задача да ја возобнови црквата, односно да го приближи народот до црквата во подосоговските села – Оризари, Грдовци и повеќе места во Кочанско. Делувајќи во такви услови воопшто не било лесно, меѓутоа со духот со кој располагал отец Миладин, со мудроста и желбата да направи што повеќе за спасение на своите верници, тој оставил траен белег во колективната меморија на луѓето кои живеат под ова поднебје, истакна Марјан Гијовски, коавтор на книгата.
Промоцијата беше во организација на ЈОУБ „Искра“ и Општина Кочани, по повод 32. издание на манифестацијата „Денови на кочанскиот ориз“, а промотори беа д-р Јасмина Дамјановска и Иван Котев.
Авторите порачаа секој кој е во можност да ја прочита книгaта бидејќи има што да се научи.
Ленче Стоименова е роднокрајна авторка, афористичарка, поетеса, рецезентка, промоторка и има напишано четиринаесет книги, а на дванаесет е коавторка. М-р Марјан Гиовски е автор на неколку научни статии, а во моментот е докторант на Институтот за национална историја.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
