Попладнево во малата сала на Мултикултурниот центар во Кочани се одржа промоција на книгата „Радоста на постоењето“ од авторката Симона Петреска.
Тоа е нејзино прво дело, што го има пишувано околу седум месеци, а мотивот да го создаде е влијанието на мислите и емоциите врз креирањето на секојдневниот живот на човекот.
-Книгата ја напишав од лично искуство, во еден период од животот сфатив дека сум заглавена, односно дека не го живеам животот што сакам да го живеам, дека не се чувствувам среќно, па се запрашав што треба да направам за да го сменам тоа. Почнав да читам книги, кои што се мотивациони, гледав и голем број видеа и полека, но сигурно го почнав мојот пат на промената во животот на подобро. Сето ова искуство и сето тоа што го научив го применив на мене и почуствував дека делува, затоа што мојот живот стануваше поубав, среќен, радосен, почнав да живеам живот исполнет со мир, љубов и благодарност. Затоа решив сето тоа што го знам да го преточам во пишан збор и да ги мотивирам читателите да се пронајдат во мојата книга, и читајќи ја да започнат промена кај себе, онаму каде што сметаат на подобро, истака Симона Петреска, авторка на книгата.
Промоцијата беше во организација на библиотеката „Искра“, со поддршка од Ротари клубот Кочани – Виница. Директорката на установата истакна дека промовираното дело е мотивациска книга, која треба да најде примена кај секоја личност.
-ЈОУ Библиотека „Искра“ пред крајот на 2023 година бележи уште една активност, а која е на наше огромно задоволство. Активноста спонтано дојде, во соработка со Васил Таковски и со поддршка на Ротари клубот Кочани-Виница, на нивна иницијатива се договоривме денеска да ја промовираме книгата, истакна Кристина Горгиевска Атанасова, директорка на Библиотеката „Искра“.
Промотор на книгата беше Љупка Стојменова, а авторката најави и промоција на уште една, односно во моментот работи на втората, која е со слична тематика, односно опишува за тоа што ни се случува во животот и општеството, гледано низ призмата на духовноста.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
