Пензионерите од Кочани денеска организираа мирен протест на кој побараа наместо најавеното процентуално, зголемувањето на пензиите од септември да биде линеарно, односно во апсолутен износ од по 3.500 денари.
На протестот беше нагласено дека во Кочани има над 6.200 пензионери, а со процентуалното покачување од 6,8 отсто ќе бидат онеправдани повеќе од половината од нив кои земаат пензија под 15 илјади денари.
– Ние сме пензионери кои земаме пензија од државниот пензиски фонд во кој месечно се собираат близу 17 милијарди денари, плус се финансираме од двата приватни пензиски столба кои учествуваат со 5,4 милијарди денари. Тие средства не стигнуваат за сите пензии, а она што го бараме е зголемувањето да биде линеарно. Целта ни е да се надмине несигурноста кај пензионерите со ниски пензии. Лично имам висока пензија, но барам линеарно зголемување затоа што и со тоа нема да изгубам ништо, туку солидарно ќе добијам колку што ќе добијат и другите пензионери, истакна Благој Беќарски, претставник на пензионерите од Кочани.
Пензионерите побараа воведување на минимална пензија и при зголемување на минималната плата линеарно да се зголемуваат и пензиите.
-Ако минималната плата е нешто над 20 илјади, тогаш најниската пензија да биде 80 отсто од тој износ, односно 16 илјади денари месечно. Мора да има некаков лимит под кој не може да се оди, затоа што половина од средствата ги трошиме за лекарства, а на пензионерите со минимални пензии малку им останува за другите потреби, истакна Орце Давитков, пензионер од Кочани.
Пензионерите кои протестираа најавија дека ќе формираат посебно тело кое ќе го координира протестот и заедно со колегите од другите градови ќе работат на исполнување на барањата.
©2023 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
