ПСК „Осогово“ го одржа редовното годишно собрание на кое беа разгледани активностите и резултатите што се постигнати во минатата, како и за планот за работа за оваа година. Присуствуваа поголем број активни членови на клубот кои учествувале во планинарските акции.
Во рамки на работниот состанок беа доделени и благодарници за членовите на клубот кои постигнале значајни резултати во изминатата година.
-Изминатата година за нас беше доста успешна година заради што и го добивме признанието од Општина Кочани и новинарите за најдобар Спортски клуб на Кочани за 2023 година. За минатата година ќе го истакнам учеството во Меѓународната експедиција во Киргистан на Хималаите со искачување на врвовите Јухин на 5.130 метри, Еделвајс – 4.805 метри и Разделнаја 6.148 метри. Искачување на Алпите на врвовите Зумштајншпиц во Швајцарија 4.563 метри и Гран Парадисо 4.061 метри – највисокиот врв во Италија. Имаме искачено и еден од најтешките врвови во Словенија. Наш член испраќаме на искачување на највисокиот врв во Америка на околу 6.900 метри. Му посакуваме добар лет, добро време и жив и здрав да ни се врати со позитивни резултати. Секоја година зачленуваме нови членови кои сакаат да планинарат, а само денеска на ова годишно собрание имаме 15 нови, со кои броиме над 100 членови. Во 2024 година се надевам дека ќе постигнеме уште поголеми признанија, а за прв пат во историјата на државата ќе го организираме најголемиот собир по повод Светскиот ден на планината, што ќе се одржи на Пониква, истакна Тошо Антов, претседател на ПСК „Осогово“ Кочани.
Заклучокот од релизираното годишно собрание беше дека планинарењето треба да стане нов начин на живот и еден од поатрактивните спортови во нашата државата.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
